Расійскаму спеваку Шарлоту, які спаліў пашпарт, запыталі сем з паловай гадоў калоніі
Спеваку Шарлоту запыталі каля 7,5 гадоў калоніі па справе аб распальванні нянавісці, абразе пачуццяў вернікаў і рэабілітацыі нацызму, піша Медыязона.
Дзяржабвінавачанне запытала сем гадоў і пяць месяцаў калоніі і штраф у 299 тысяч расійскіх рублёў (каля 3 тысяч даляраў) спеваку Эдуарду Шарлоту.
Выканаўцу абвінавачваюць у распвальванні нянавісці па прыкмеце нацыянальнасці з пагрозай прымянення гвалту, абразе пачуццяў вернікаў, пашкоджанні дакументаў і двух эпізодах рэабілітацыі нацызму.
Паводле версіі следства, музыка апублікаваў відэа, якія «апаганьваюць вайсковую славу» і «абражаюць пачуцці вернікаў».
У адным з іх ён разарваў літару Z, афарбаваную ў колеры георгіеўскай стужкі, У другім — «перарабіў тэкст песні «Дзень Перамогі» з відавочна абразлівым характарам». У трэцім роліку спявак сапсаваў ваенны білет і прыбіў яго да крыжа разам з партрэтам Патрыярха Кірыла. У чацвёртым відэа ён спаліў свой расійскі пашпарт на знак пратэсту супраць вайны ва Украіне.
Ад абвінавачвання па эпізодзе са знішчэннем пашпарта пракурор вырашыў адмовіцца. На пасяджэнні 20 снежня Шарлот распавёў пра пагаршэнне свайго псіхічнага здароўя.
«Патрэбны псіхолаг. У мяне быў біпалярны разлад, ёсць даведка. Яно нікуды не падзелася. У мяне ў галаве не ўкладваецца, колькі гэта доўжыцца і колькі гэта яшчэ працягнецца», — цытуе яго выданне.
Музыканта затрымалі ў лістападзе 2023 года ў аэрапорце Пулкава, куды ён прыляцеў з Ерэвана. У той жа дзень кіраўнік «Лігі бяспечнага Інтэрнэту» Кацярына Мізуліна апублікавала відэа з выбачэннямі спевака.
Першапачаткова музыканта адправілі пад адміністрацыйны арышт на 13 сутак па пратаколе аб дробным хуліганстве, а пасля гэтага этапавалі ў Самару ўжо ў рамках крымінальнай справы — там жа яму абралі меру стрымання. На пасяджэнні Шарлот сказаў, што «падтрымлівае СВА», і прачытаў уласныя вершы: «Расія, нагрубіў табе з парога»
З СІЗА Шарлот напісаў ліст патрыярху Кірылу з пакаяннем і просьбай яму дараваць. У лістападзе стала вядома, што патрыярх РПЦ дараваў музыканту і папрасіў не караць яго.
Цяпер чытаюць
«Ганна адказала: «Так!» Віталь Гуркоў зрабіў прапанову рукі і сэрца. Хто ж нявеста?9
Каментары