Rasijskamu śpievaku Šarłotu, jaki spaliŭ pašpart, zapytali siem z pałovaj hadoŭ kałonii
Śpievaku Šarłotu zapytali kala 7,5 hadoŭ kałonii pa spravie ab raspalvańni nianaviści, abrazie pačućciaŭ viernikaŭ i reabilitacyi nacyzmu, piša Miedyjazona.
Dziaržabvinavačańnie zapytała siem hadoŭ i piać miesiacaŭ kałonii i štraf u 299 tysiač rasijskich rubloŭ (kala 3 tysiač dalaraŭ) śpievaku Eduardu Šarłotu.
Vykanaŭcu abvinavačvajuć u raspvalvańni nianaviści pa prykmiecie nacyjanalnaści z pahrozaj prymianieńnia hvałtu, abrazie pačućciaŭ viernikaŭ, paškodžańni dakumientaŭ i dvuch epizodach reabilitacyi nacyzmu.
Pavodle viersii śledstva, muzyka apublikavaŭ videa, jakija «apahańvajuć vajskovuju słavu» i «abražajuć pačućci viernikaŭ».
U adnym ź ich jon razarvaŭ litaru Z, afarbavanuju ŭ kolery hieorhijeŭskaj stužki, U druhim — «pierarabiŭ tekst pieśni «Dzień Pieramohi» ź vidavočna abraźlivym charaktaram». U trecim roliku śpiavak sapsavaŭ vajenny bilet i prybiŭ jaho da kryža razam z partretam Patryjarcha Kiryła. U čaćviortym videa jon spaliŭ svoj rasijski pašpart na znak pratestu suprać vajny va Ukrainie.
Ad abvinavačvańnia pa epizodzie sa źniščeńniem pašparta prakuror vyrašyŭ admovicca. Na pasiadžeńni 20 śniežnia Šarłot raspavioŭ pra paharšeńnie svajho psichičnaha zdaroŭja.
«Patrebny psichołah. U mianie byŭ bipalarny razład, jość daviedka. Jano nikudy nie padziełasia. U mianie ŭ hałavie nie ŭkładvajecca, kolki heta doŭžycca i kolki heta jašče praciahniecca», — cytuje jaho vydańnie.
Muzykanta zatrymali ŭ listapadzie 2023 hoda ŭ aeraporcie Pułkava, kudy jon prylacieŭ ź Jerevana. U toj ža dzień kiraŭnik «Lihi biaśpiečnaha Internetu» Kaciaryna Mizulina apublikavała videa z vybačeńniami śpievaka.
Pieršapačatkova muzykanta adpravili pad administracyjny aryšt na 13 sutak pa pratakole ab drobnym chulihanstvie, a paśla hetaha etapavali ŭ Samaru ŭžo ŭ ramkach kryminalnaj spravy — tam ža jamu abrali mieru strymańnia. Na pasiadžeńni Šarłot skazaŭ, što «padtrymlivaje SVA», i pračytaŭ ułasnyja vieršy: «Rasija, nahrubiŭ tabie z paroha»
Ź SIZA Šarłot napisaŭ list patryjarchu Kiryłu z pakajańniem i prośbaj jamu daravać. U listapadzie stała viadoma, što patryjarch RPC daravaŭ muzykantu i paprasiŭ nie karać jaho.
Ciapier čytajuć
Redaktara niezaležnaj baranavickaj haziety «Inteks-Pres» Janukieviča prysudzili da 14 hadoŭ kałonii, jaho namieśnika Pakalenku — da 12 hadoŭ5
Kamientary