Матэрыял для лепшага захавання энергіі знайшлі ў нечаканым месцы
Навукоўцы з Германіі знайшлі даволі нестандартны і экалагічны спосаб для павелічэння даўгавечнасці акумулятараў.
Літый-іонныя батарэі сёння з'яўляюцца найбольш распаўсюджанымі відамі акумулятараў на сусветным рынку. Аднак літый і кобальт, што выкарыстоўваюцца ў гэтых батарэях, дарагія, а іх здабыча шкодзіць навакольнаму асяроддзю і часта суправаджаецца парушэннем правоў рабочых, эксплуатацыяй дзіцячай працы і ваеннымі канфліктамі. Але ёсць альтэрнатыва — натрыева-серныя батарэі, якія, наадварот, значна таннейшыя, больш даступныя і экалагічныя.
Галоўны мінус натрыева-серных батарэй — іх меншая ёмістасць і хуткая самазнішчальнасць. Часцінкі серы, якія павінны заставацца на адным баку такіх батарэй (катодзе), хаатычна мігруюць на другі бок (анод), што прыводзіць да страты серы і пагаршае працу батарэі.
Каманда даследчыкаў з Інстытута калоідаў і інтэрфейсаў Макса Планка (Германія) змагла прыбраць гэты недахоп, распрацаваўшы спецыяльны нанаматэрыял для натрыева-серных батарэй на аснове ліналаолу — ключавога кампаненту лавандавага алею.
Ліналаол змог цалкам спыніць працэс хаатычнай міграцыі часцінак серы, высветлілі нямецкія навукоўцы.
Вынікі даследавання паказалі, што натрыева-серныя акумулятары, заснаваныя на новым матэрыяле, захоўваюць больш за 80% першапачатковай ёмістасці пасля 1500 цыклаў зарадкі і разрадкі (у звычайных літый-іонных батарэй зніжэнне ёмістасці да 80% адбываецца ўжо пасля 300—500 такіх цыклаў).
Навукоўцы ўпэўненыя, што гэта адкрыццё можа прыцягнуць увагу энергетычных кампаній і паскорыць пераход да большага выкарыстання натрыева-серных батарэй. Гэта сведчыць пра тое, што рашэнні для энергетычнага пераходу могуць быць знойдзеныя там, дзе іх найменш чакаеш — нават у звычайнай лавандзе.
Цяпер чытаюць
Сілавікі расказалі, як гродзенскія блогеры трацілі мільён, сабраны нібыта на лячэнне дзіцяці3
Каментары