У Судане паўстанцы пагадзіліся на гуманітарнае перамір’е па прапанове ЗША і арабскіх краін. Урад супраць

Нядаўна СХР захапілі горад Эль-Фашыр — апошні буйны населены пункт у заходнім рэгіёне Дарфур, які яшчэ трымаў пад кантролем суданскі ўрад. Аблогу горада паўстанцы трымалі каля паўтара года. Увесь гэты час гуманітарная дапамога туды не паступала і, па даных ААН, у горадзе пачаўся голад.

Пасля ўзяцця Эль-Фашыра з’явіліся паведамленні пра масавыя забойствы мірных жыхароў і разбурэнні. Арганізацыя Аб’яднаных Нацый і праваабаронцы сцвярджаюць, што сітуацыя ў горадзе крытычная. Самі ж СХР адмаўляюць, што здзяйснялі злачынствы, але прызнаюць, што «пэўныя байцы парушалі дысцыпліну» і, паводле іх слоў, частку з іх ужо арыштавалі.

Пасля гэтых падзей СХР заявілі, што пагаджаюцца на гуманітарнае перамір’е, прапанаванае ЗША, Саудаўскай Аравіяй, Аб’яднанымі Арабскімі Эміратамі і Егіптам. Гэтае перамір’е павінна працягвацца тры месяцы і даць магчымасць даставіць дапамогу людзям, якія апынуліся ў зонах баявых дзеянняў.

У заяве СХР гаворыцца, што мэта перамір’я — «пераадолець катастрафічныя гуманітарныя наступствы вайны» і стварыць умовы для перамоў аб міры. Паўстанцы таксама заявілі пра гатоўнасць да палітычнага дыялогу, які б вырашыў «глыбокія прычыны канфлікту» і прывёў да «справядлівага і трывалага міру».

Аднак урад Судана не падтрымаў прапанову. Міністр абароны краіны Хасан Кабрун заявіў у тэлезвароце, што краіна будзе працягваць падрыхтоўку да вайны, бо гэта «законнае права суданскага народа». Ён падзякаваў адміністрацыі прэзідэнта ЗША Дональда Трампа за спробу ўрэгуляваць сітуацыю, але дадаў, што без поўнага раззбраення СХР ніякіх перамоў не будзе.

Прадстаўнік суданскага ўрада ў кенійскім Найробі Махамед Асман Акаша таксама адзначыў, што ўрад гатовы спыніць баявыя дзеянні толькі ў тым выпадку, калі СХР будуць распушчаныя, а іх лідараў прыцягнуць да адказнасці за злачынствы супраць насельніцтва.

Тым часам міжнародныя арганізацыі б’юць трывогу: Судан перажывае найбольшы гуманітарны крызіс у свеце. Паводле ААН, больш за 24 мільёны чалавек (амаль палова насельніцтва) цярпяць ад недахопу ежы, вады і медыцынскай дапамогі.

У многіх рэгіёнах краіны дзейнічаюць палявыя кухні і валанцёрскія арганізацыі, якія кормяць мясцовых жыхароў, але запасаў прадуктаў хопіць толькі на некалькі месяцаў. Дабрачынная арганізацыя Islamic Relief паведамляе, што ў найбліжэйшыя паўгода большая частка гэтых кухняў можа спыніць працу з-за недахопу харчавання і сродкаў.

Пасля захопу Эль-Фашыра з горада ўцяклі больш за 60 тысяч чалавек. Многія з іх цяпер жывуць у лагерах для бежанцаў у рэгіёне Тавіла, дзе ўмовы застаюцца вельмі цяжкімі — не хапае ежы, лекаў і пітной вады.

• 0
• 0
• 0
• 1
• 0
• 1
• 0
• 0