Па выніках візіту Лукашэнкі ў Венесуэлу падпісана 22 пагадненні
Па выніках візіту Аляксандра Лукашэнкі ў Венесуэлу падпісана 22 пагадненні аб супрацоўніцтве ў галіне гандлю, сельскай гаспадаркі, энергетыкі і будаўніцтва, паведамляе Баліварыянскае агенцтва навін (ABN).
Дакументы прадугледжваюць, у прыватнасці, праектаванне і будаўніцтва аграгарадка ў адным з раёнаў Венесуэлы, стварэнне вытворчай базы для выпуску сельгаспрадукцыі, будаўніцтва сервіснага цэнтра для машын і абсталявання, пастаўку беларускага абсталявання для перапрацоўкі металалому, узвядзенне двух заводаў па утылізацыі акумулятарных батарэй.
З 1 мая Венесуэла будзе прадаваць Беларусі штодня 80 тыс. барэляў нафты (12,6 тыс. тон). У далейшым аб’ёмы паставак плануецца павялічыць. Нафта будзе перапрацоўвацца на беларускіх НПЗ для наступнага продажу ў Цэнтральнай Еўропе. Венесуэла разлічвае выйсці на еўрапейскі рынак энерганосьбітаў, заявіў прэзідэнт краіны Уга Чавес.
Падпісана пагадненне аб распрацоўцы газавых радовішчаў у Венесуэле. На першым этапе СП «БелоВенесолана» будзе здабываць штодня 40 млн. кубічных футаў газу (1,13 млн. кубаметраў). Да 2012 года здабыча павінна вырасці ў пяць разоў. Аб’ём інвестыцый ацэньваецца ў 1,6 млрд. даляраў. Паводле слоў Чавеса, пацверджаныя запасы газу ў Венесуэле складаюць 200 трлн. кубічных футаў (5,66 трлн. кубаметраў). Геолагаразведачныя работы на сушы і моры павінны павялічыць гэтую лічбу ўдвая, што выведзе Венесуэлу на чацвёртае месца ў свеце пасля Расіі, Катара і Ірана.
Як паведамляе Першы канал беларускага тэлебачання, на працягу двух месяцаў будзе створана сумеснае прадпрыемства для пастаўкі венесуэльскай нафты ў Беларусь. Акрамя таго, падпісаны кантракт на пастаўку ў Венесуэлу 1.300 адзінак дарожна‑будаўнічай тэхнікі беларускай вытворчасці амаль на 200 млн. даляраў. Да 1 ліпеня 2011 года беларускія будаўнікі ўзвядуць заводы па выпуску тэхнікі МАЗ (5 тыс. адзінак у год) і МТЗ (10 тыс.). Сёлета ў першым паўгоддзі Беларусь паставіць тэхніку БелАЗ на 20 млн. даляраў.
Цяпер чытаюць
«Наіўна спадзяваліся зарабляць у Еўропах, прыязджаць дадому лячыць зубы на халяву і здаваць кватэру». Прапаганда пачала апраўдваць дарагія жыроўкі для «дармаедаў»2121
Каментары