«Губляю 300 рублёў у месяц». Айцішнікі з заробкам у далярах наракаюць на падзенне курсу

Айцішнікі з Польшчы хвалююцца і не супраць абмеркаваць пераход на злотыя, а ў Беларусі вераць, што даляр адновіцца.

Артур, фронтэнд, досвед у ІТ — 5+ гадоў, жыве ў Мінску. Для яго падзенне даляра «не адчувальнае», бо зарплата — «толькі адна з крыніц» даходу.

— Усе вялікія выдаткі і пакупкі і так, і так прывязаныя да даляра. А штодзённыя пакупкі, такія як прадукты, — не самы вялікі артыкул расходаў у месяц, — кажа ён.

Артур лічыць, што хвалявацца і нешта рабіць не варта: «на доўгай дыстанцыі рубель будзе таннець, а інфляцыя даляра — ніжэй».

Андрэй (распрацоўшчык, у ІТ — 6 гадоў) таксама жыве і працуе ў Беларусі, зарплата ў яго ў далярах — але выплачваюць у рублях па курсе.

— Прасяданне даляра, калі і хвалюе, дык не настолькі, каб перашкаджала спаць. Я тут [у Беларусі] усё жыццё пражыў, шмат чаго бачыў — і не вельмі веру ў тое, што рубель у сярэдняй і доўгатэрміновай перспектыве (ад 1 года) здольны выступаць як надзейны сродак назапашвання. Да ІТ проста адкладаць не было чаго.

Уся гэтая сітуацыя з курсам хвалюе мяне, мабыць, толькі таму, што цэны ў «белках» выраслі разам з курсам, а калі курс пачаў падаць — назад уніз яны не пайшлі. Так што адзінае, што я «страціў», можна сказаць, — гэта пэўная прасяданне маёй зарплаты па пакупніцкай здольнасці. Заначка ж нічога не страціла — яна як была ў еўра і далярах, так і засталася.

Калі шчыра, я нават не ведаю, што тут можна сказаць: каб хвалявацца з-за падзення курсу даляра, трэба моцна верыць у беларускі рубель, а ў яго не верыць нават Нацбанк. Так, непрыемна, але не крытычна — вось як. Тым больш, я падазраю, што цягам года-двух даляр сваё адыграе.

Падобную пазіцыю выказвае і Аляксандр —.NET-распрацоўшчык (досвед у ІТ — 7 гадоў) з Мінска.

— Непрыемна — цэны ж ад гэтага не зніжаюцца. Але ёсць надзея, што даляр у перспектыве ўмацуецца, як ён звычайна гэта рабіў. Я ў сярэднім страчваю 300 рублёў ад зарплаты пры прасадцы курсу даляра на 0,1 — але радуе хоць тое, што і за кватэру цяпер плаціць менш.

Віталь — топ-менеджар, у ІТ — 7 гадоў, «апошнія 4 гады яго зарплата прывязаная да даляра». Жыве і працуе ў Беларусі.

— Падзенне курсу даляра мяне не турбуе, бо тады я радуюся за ўсіх, а калі даляр расце — я радуюся за сябе.

Аляксандр — распрацоўшчык на Go (4 гады досведу ў ІТ). Ён працуе ў Беларусі.

— Не чакаў такой моцнай прасадкі даляра. Але веру, што гэта часова і курс вернецца на ўзровень 3,2—3,3, калі не вышэй.

Вядома, страты адчуваюцца, бо ў рублях сума выходзіць менш, а цэны застаюцца на месцы. Аднак радуе, што арэнда кватэры таксама прывязаная да даляра.

Аляксандр кажа, што на яго штодзённыя выдаткі падзенне курса даляра не паўплывала — «хіба што трохі менш валюты магу купіць».

Раман (Full Stack QA, 4+ гады ў ІТ) кажа, што перажывае з-за падзення курсу даляра.

— Калі быў рост з 3,1 да 3,5 — гэта было як павышэнне зарплаты на +15% на роўным месцы. Паслугі і тавары тады не змяняліся ў кошце, таму павышэнне было прыемнае, а адкат — наадварот. Я яшчэ і страчваю, калі расплачваюся крэдыткай (яе выгадна выкарыстоўваць, калі курс даляр расце).

Зарплата Мікіты (ён фронтэнд-распрацоўшчык з досведам у ІТ 4 гады, жыве ва Уроцлаве) прывязаная да даляр.

— Я пераехаў з Беларусі крыху больш за паўтара года таму — тады курс даляра да злотага быў 4,3, цяпер — 3,8. Усе назапашванні — у далярах.

Цэны ў Польшчы мне спачатку здаваліся ніжэйшымі за беларускія (я гавару не пра ежу, а пра рэчы — кнігі, настолкі). Былі думкі пра куплю жылля, але цяпер давядзецца адкласці. Мы з дзяўчынай ужо жартуем, што толькі яна ў нашай пары зарабляе нармальныя грошы, бо яе зарплата ў злотых.

Які выхад: перавесці зарплату ў злотыя не атрымаецца, бо я працую на амерыканскую кампанію. Пачаў хадзіць на сумоўі — але гэта, калі шчыра, не звязана з прасадкай курсу даляра. Я ўсё яшчэ ўпэўнены, што ён адновіцца да 4, Трамп жа не вечны.

Яшчэ мы з дзяўчынай абмяркоўваем на словах, што трэба б пачаць эканоміць, але насамрэч ніякіх змен не адбылося.

Яшчэ адзін Андрэй (прадуктовы менеджар, больш за 15 гадоў у ІТ) жыве ў Польшчы. Прасадка курсу даляра яго «пакуль не турбуе, але калі ён апусціцца ніжэй за 3,5 — тады буду нервавацца».

— Опцыі перавесці аплату ў злотыя няма, бо я працую на амерыканскую кампанію. Каманда ў нас не проста польская — большасць супрацоўнікаў з аднаго горада. Напэўна, даляр працягне падаць, і мы будзем абмяркоўваць карэкціроўку зарплаты на ўзроўні каманды.

Андрэй прызнаўся, што зберажэнні ў яго прыкладна роўнымі часткамі захоўваюцца ў далярах, еўра і злотых. «Але суадносіны трошкі мяняюцца. Напрыклад, адзін з папярэдніх працадаўцаў плаціў у еўра — і тады падрасла еўравая падушка. Цяпер расце даляравая».

• 0
• 1
• 2
• 0
• 0
• 0
• 0
• 0