У райцэнтры Бялынічы Магілёўскай вобласці, у якім з XVI стагоддзя быў каталіцкі храм, вядомы сваёй цудатворнай іконай, будзе пабудаваны касцёл-санктуарый, піша Katolik.life. Праект вынесены на грамадскае абмеркаванне.
Пад узвядзенне санктуарыя Маці Божай Бялыніцкай выдзелены ўчастак у 0,72 га — на скрыжаванні вуліц Ленінскай і Мічурына, на месцы знішчаных старадаўніх каталіцкіх могілак.
Пакуль у горадзе функцыянуе толькі каталіцкая капліца, якая з'явілася пасля адраджэння парафіі ў 1993 годзе. Храм у католікаў забралі расійскія ўлады ў 1876 годзе і перадалі яго праваслаўным. У 1960-я гады савецкія органы ўзарвалі касцёл і кляштар у Бялынічах.
Між тым менавіта адсюль «родам» Каралева Беларусі — абраз, які шануюць і католікі, і праваслаўныя. У горадзе ўжо ёсць праваслаўны храм у гонар Маці Божай Бялыніцкай, а цяпер з'явіцца і каталіцкі.
У паведамленні аб правядзенні грамадскага абмеркавання, якое працягнецца да 7 красавіка, пазначана, што на ўчастку запраектаваныя: будынак касцёла, высадка новых дэкаратыўных дрэў і кустоў, уладкаванне кветнікаў, лавак. Таксама плануецца ўзвядзенне гаспадарчага блока і мемарыяльнай капліцы-званіцы ў памяць пра знішчаныя каталіцкія могілкі. Вакол будынка запраектаваны перыметральны абыход Крыжовага шляху.
Малітоўная зала разлічаная максімальна на 70 месцаў. У падвальна-цокальным паверсе будуць зала на 48 чалавек, парафіяльнае бюро, клас для катэхезы. Над сакрыстыяй прадугледжаныя два тэхнічныя ўзроўні для абслугоўвання алтара (заслона цудатворнага абраза Маці Божай).
Алтары і алтарныя кампазіцыі будуць выкананыя з граніту, цэглы або блокаў пад венецыянскую тынкоўку. У вокнах, меркавана, будуць вітражы.
Цяпер чытаюць
У Мінску масажыст Андрэй таемна здымаў голых кліентак12
Каментары