Каб не трапіць у СІЗА, расійскі апазіцыйны блогер пайшоў на вайну. Днямі яго пахавалі ў закрытай труне
На фронце колішні прыхільнік Навальнага Міхаіл Алфераў перагледзеў сваю пазіцыю. Ён спадзяваўся вярнуцца на радзіму ў якасці «героя СВА».
Апазіцыйны блогер з расійскага Кемерава Міхаіл Алфераў вёў ютуб-каналы «Вораг свінасабак» і «Казачны Кузбас». У 2022 годзе на яго завялі крымінальную справу за публікацыю роліка ў падтрымку Аляксея Навальнага. Пасля яшчэ дадаліся справы за распальванне варожасці ў адносінах суддзі, паклёп і прымяненне гвалту ў адносінах прадстаўніка ўлады.
Алферава трымалі пад хатнім арыштам, але маглі ў любы момант перавесці ў СІЗА. Пры гэтым расійскія сілавікі намякалі на магчымую крымінальную справу за згвалтаванне і на будучыя праблемы праз гомасэксуальнасць блогера.
У выніку апазіцыйны блогер вырашыў падпісаць кантракт з Міністэрствам абароны Расіі, каб не трапіць у СІЗА. У красавіку 2024 года Міхаіл Алфераў адправіўся на фронт. Спачатку яго пакінулі пры штабе, дзе ён запісваў прапагандысцкія ролікі. Ён нават пераконваў некаторых сяброў па апазіцыйнай дзейнасці таксама ехаць на вайну.
Кемераўская апазіцыйная журналістка прапаноўвала Алфераву магчымасць эвакуацыі, але той адмаўляўся і тлумачыў, што на вайне адчувае сябе патрэбным і спадзяецца вярнуцца на радзіму ў якасці «героя СВА».
Урэшце блогера перавялі на перадавую. Пратрымаўся ён там нядоўга. Як мяркуецца, Алфераў загінуў 25 снежня 2024 года. Тыдзень таму яго пахавалі ў Кемераве ў закрытай труне.
Каментары
Хіба, што НН у закладніках у "хорошіх русскіх", тады дайце неяк сігнал.