Аркадзь Добкін сышоў з кіраўніцтва ЕРАМ? Імаверна, гэта фармальныя перастаноўкі
Бізнэсмен фармальна змяншае свой удзел у аперацыйным кіраванні EPAM, пры гэтым атрымлівае права ўмяшання ў справы кампаніі, будучы на пазіцыі executive chairman у дырэктарскай радзе. Гэта падобна да фінта для амерыканскага рынку.
Замена Аркадзя Добкіна на Балажа Фееша на чале ЕРАМ адбываецца на фоне драматычнага прасядання акцый кампаніі, якія з пачатку года страцілі ў цане 30,5%. Хоць ЕРАМ паказвае нармальныя, нават троху вышэй за планаваныя, фінансавыя вынікі, прагназісты і аналітыкі амерыканскага фінансавага рынку ў асноўным чакаюць далейшага падзення каціровак кампаніі.
Сёння адна акцыя ЕРАМ каштуе $159 — гэта ўзровень лютага 2019 года, у той час як многія іншыя тэхналагічныя лідары амерыканскага рынку за гэтыя гады кратна памножылі свае ацэнкі на рынку.
У гэтых умовах адбылася замена СЕО — непасрэднага аперацыйнага кіраўніка кампаніі.
Канечне, магчыма, што Аркадзь Добкін проста стаміўся ад аперацыйнага кіравання кампаніяй і вырашыў засяродзіцца на стратэгічных пытаннях. З іншага боку, вельмі імаверна, што шматгадовага кіраўніка кампаніі Добкіна «пара было» звольніць пад ціскам мажарытарных акцыянераў, каб палепшыць пазіцыі ЕРАМ на фондавым рынку (самому Добкіну належыць невялікая частка акцый кампаніі, сам ён, як і мажарытарыі, таксама ад пачатку года «пабяднеў» на 30%).
Калі верыць сайту EPAM, Аркадзь Добкін да таго ж быў Chairman of the Board — кіраўніком дырэктарскай рады з нагляднай функцыяй. Цяпер жа, пасля сваёй адстаўкі з пасады СЕО, сама назва пасады ў дырэктарскай радзе стала гучаць іначай. У прэс-рэлізе сказана, што Аркадзь Добкін стане executive chairman. Гэта азначае, што ў яго не знікае права на ўмяшальніцтва ў аперацыйныя справы кампаніі.
Топ-менеджараў кампаніі здымае і прызначае дырэктарская рада, куды трымальнікі акцый прызначаюць сваіх прадстаўнікоў. Па сутнасці Добкін звольніў сам сябе.
Цяпер чытаюць
Соф'я Сапега: Пратасевіч нагаварыў на мяне цэлы том крымінальнай справы48
Соф'я Сапега: Пратасевіч нагаварыў на мяне цэлы том крымінальнай справы
«Пасля першага забойства з ім развялася жонка». Што вядома пра шматдзетнага Сяргея са Столінскага раёна, які пасля вызвалення з калоніі забіў трох чалавек33
Каментары