Аб новым фільме ўкраінскага рэжысёра Сяргея Лазніцы расказаў кінакрытык Антон Долін.
Першы за апошнія сем гадоў мастацкі фільм украінскага кінарэжысёра Сяргея Лазніцы «Два пракуроры» — вынік сумеснай вытворчасці кінакампаній Францыі, Нідэрландаў, Германіі, Латвіі, Літвы і Румыніі. Фільм, які ў гэтым годзе ўвайшоў у конкурсную праграму Канскага кінафестывалю, зняты па матывах аднайменнай аповесці Георгія Дзямідава аб сталінскіх рэпрэсіях.
Галоўны герой фільма — малады пракурор, які кідае выклік сістэме масавага знішчэння і адпраўляецца на пошук справядлівасці, але ў выніку сам трапляе ў лагер.
На новы фільм Сяргея Лазніцы звярнуў увагу кінакрытык Антон Долін.
«Там апавядаецца, як у 1937 годзе следчы патрабуе ад чалавека, арыштаванага, адгадаць, да якой справы яго хочуць «падшыць». Гэта значыць, ты павінен сам здагадацца, прызнацца, што ты японскі шпіён ці што ты трацкіст. Табе падказваць не будуць.
Ты павінен прыдумаць сабе віну, але не любую, а тую, якая ўкладваецца ў інтарэсы следства, у якога ёсць план па раскрыцці. Трэба кожны месяц раскрыць столькі трацкістаў, а столькі японскіх шпіёнаў», —
раскрывае некаторыя падрабязнасці Долін у інтэрв’ю YouTube-каналу «І грянуў Грэм».
Долін адзначае, што Лазніцы ўдалося падрабязна паказаць абсурднасць сітуацыі. У гэтым яго фільм падобны да рамана «Працэс» Франца Кафкі:
«Чалавека арыштоўваюць ні за што. Не таму, што ён у нечым вінаваты. Ён павінен сам прыдумаць сабе віну, для таго каб дапамагчы сваім катам сябе асудзіць. І тады яго асудзяць не занадта жорстка, таму што, калі не, тады яго будуць біць, катаваць і мучыць.
І яшчэ і прыдумаюць для яго віну горшую, чым ён прыдумаў бы для сябе. Гэта класны, цікавы абсурдысцкі парадокс. І гэта чыста Кафка. Тут не трэба нават паміж імі нейкіх масткоў праводзіць. Кафка гэта ўсё апісаў у «Працэсе». Гэта так і працуе», — даводзіць Долін.
Навошта гэта патрэбна? Як тлумачыць кінакрытык, у сістэме тэрору галоўная мэта — не пакараць злачынцу, які на самой справе такім не з’яўляецца, а «стварыць машыну тэрору, якая створыць грамадства абсалютнага паслухмянства, якое цалкам кантраляванае, усе чалавечыя і іншыя рэсурсы якога будуць належаць сістэме».
Афіцыйнага трэйлера фільма пакуль няма. Невялікія ролікі прадстаўлены на сайце Канскага кінафестывалю.
Рэжысёр Сяргей Лазніца расказаў, як ствараўся фільм «У тумане» і чаму яго цэнзураваў Мінкульт
Украінскі рэжысёр Сяргей Лазніца пра адмену рускай культуры: Гэта цырк і абсурд
Ураджэнца Баранавіч, украінскага рэжысёра Сяргея Лазніцу выключылі з украінскай кінаакадэміі за фільмы на расійскім фестывалі
«Кожная хвіліна існавання пацвярджала відавочнае: ты — саўдзельнік». Вядомы кінакрытык Антон Долін з'ехаў з Расіі
Цяпер чытаюць
«А зможаце вылецець заўтра?» Джон Коўл расказаў, як піў з Лукашэнкам гарэлку, каб дамовіцца пра вызваленне палітвязняў7
Каментары