Касмічны карабель Starship, распрацаваны кампаніяй Ілона Маска SpaceX, выбухнуў над Індыйскім акіянам падчас свайго дзявятага выпрабавальнага запуску, паведамляе Euronews.
Ракета стартавала з базы Starbase у штаце Тэхас, але ўжо праз некалькі хвілін пасля ўзлёту пачаліся тэхнічныя праблемы. Замест таго каб здзейсніць запланаванае прывадненне ў Мексіканскім заліве, першая ступень ракеты разбурылася ў выніку выбуху.
Разгонны блок не змог адкрыць свае дзверы для запуску муляжоў спадарожнікаў Starlink. Пры гэтым Starship здолеў праляцець далей, чым падчас папярэдніх дзвюх спроб, аднак на 45-й хвіліне палёту адбылася ўцечка паліва і кантроль над апаратам быў страчаны. Усяго ж палёт павінен быў працягвацца 66 хвілін.
У SpaceX пацвердзілі, што адбылася «хуткая незапланаваная разборка», што з'яўляецца эўфемізмам Маска для акрэслення выбуху. Каманда працягне аналізаваць даныя і рыхтаваць наступнае выпрабаванне.
Маск адзначыў, што бачыць істотны прагрэс у параўнанні з ранейшымі прататыпамі, і заявіў пра намер запускаць Starship кожныя 3—4 тыдні.
Ён таксама падкрэсліў, што гэтыя выпрабаванні важныя для падрыхтоўкі да будучай каланізацыі Марса, якую плануецца пачаць у 2026 годзе.
З папярэдніх васьмі запускаў толькі чатыры былі ўдалымі. Хоць на зямлі пашкоджанні мінімальныя, выбух 123-метровай ракеты нясе сур’ёзную пагрозу. Ранейшыя пускі ўжо прыводзілі да затрымак авіярэйсаў і скаргаў ад эколагаў, бо касмадром знаходзіцца побач з ахоўнымі прыроднымі зонамі.
Нягледзячы на крытыку, у маі Федэральнае ўпраўленне грамадзянскай авіяцыі ЗША дазволіла павялічыць колькасць штогадовых запускаў Starship з 5 да 25.
Цяпер чытаюць
ЗША перадалі Лукашэнку найноўшыя амерыканскія лекі для пахудання14
Каментары