«Уратавалі заторы». Студэнтка спазнілася на фатальны рэйс Air India усяго на 10 хвілін, і яе не пусцілі на борт
Бхумі Чаухан памятае, якая была злая і расчараваная. З-за затораў на дарогах яе паездка да аэрапорта Ахмедабада зацягнулася настолькі, што яна спазнілася на свой рэйс Air India да лонданскага Гэтвіка ўсяго на 10 хвілін, піша Бі-бі-сі.
Чаухан, студэнтка па бізнэс-адміністраванні, якая жыве ў Брысталі са сваім мужам, прыехала ў адпачынак на захад Індыі.
28-гадовая дзяўчына павінна была ляцець дадому рэйсам AI171 у чацвер, які пацярпеў крушэнне неўзабаве пасля ўзлёту, забраўшы жыцці 241 чалавека на борце і яшчэ некалькіх на зямлі.
Але калі яна прыбыла ў аэрапорт менш чым за гадзіну да вылету, супрацоўнікі авіякампаніі не пусцілі яе на рэйс.
«Мы вельмі раззлаваліся на кіроўцу і ў роспачы пакінулі аэрапорт, — успамінае яна. — Я была вельмі расчараваная».
«Мы выйшлі з аэрапорта і спыніліся папіць гарбаты, а потым, перад ад'ездам… размаўлялі з турагентам пра тое, як атрымаць кампенсацыю за квіток. Там я і атрымала званок, што самалёт разбіўся», — дадае Чаухан.
«Гэта сапраўдны цуд для мяне», — кажа яна.
Чаухан расказвае, што прыбыла ў аэрапорт а 12:20 па мясцовым часе — на 10 хвілін пазней, чым павінна была адбыцца пасадка.
Яе электронны пасадачны талон, які бачыла BBC News, сведчыць, што ў яе было месца 36G у эканом-класе.
Аднак, нягледзячы на анлайн-рэгістрацыю, па яе словах, супрацоўнікі авіякампаніі не дазволілі ёй завяршыць працэс у аэрапорце.
Яна ехала з горада Анклешвар — за 201 км на поўдзень ад Ахмедабада — і затрымалася з-за затораў у цэнтры Ахмедабада.
«Калі я прапусціла рэйс, была прыгнечаная. Адна думка круцілася ў галаве: «Каб я выехала крыху раней, то паспела б на самалёт», — распавядае Чаухан.
«Я прасіла супрацоўнікаў авіякампаніі ўпусціць мяне, бо я спазнілася ўсяго на 10 хвілін. Казала, што я апошняя пасажырка і вельмі прашу дазволіць мне сесці на самалёт, але яны не дазволілі», — дадае яна.
Рэйс да Гэтвіка вылецеў у чацвер удзень паводле раскладу, але, як выглядае, меў праблемы з наборам вышыні і разбіўся прыкладна праз 30 секунд пасля ўзлёту.
Самалёт упаў на жылы раён, загінулі 241 чалавек на борце. Паводле папярэдніх даных, таксама загінулі прынамсі васьмёра чалавек на зямлі.
Адзін з пасажыраў, грамадзянін Вялікабрытаніі Вішвашкумар Рамеш, выжыў у катастрофе і быў шпіталізаваны з траўмамі.
На борце былі грамадзяне Індыі, Вялікабрытаніі, Партугаліі і Канады.
Каментары