Былога работніка «Гродна Азоту» збівалі ў калоніі за храпенне. КДБ пры затрыманні спрабаваў яго вербаваць
«Мяне білі, не давалі спаць. Калі перавялі ў іншы атрад, там палівалі вадой з бутэлькі».
Былы палізняволены Максім Сенік з «Гродна Азоту» расказаў на прэс-канферэнцыі, як яго пры затрыманні спрабаваў вербаваць КДБ Гродна. Прапаноўвалі, каб паехаў за мяжу і зліваў інфармацыю пра актывістаў. Мужчына адмовіўся.
На наступны дзень Максім сказаў, што гатовы прыняць прапанову — супрацоўнічаць з КДБ ён не збіраўся, проста хацеў з'ехаць у Польшчу і знікнуць там. Спецслужбісты сказалі, што не вераць яму.
Сенік расказаў, што яго ў калоніі №2 у Бабруйску білі за моцнае храпенне.
«Мяне білі, не давалі спаць. Былі такія ўмовы пастаўленыя — або я не сплю, або ніхто не спіць. Прынялі рашэнне, што я не буду спаць. Мяне перавялі ў іншы атрад. Але там ужо не білі, а палівалі вадой з бутэлькі. Здымалі коўдру, хавалі, каб я не мог спаць. Пасля я пачаў прасіцца ў ШІЗА, пасля ў ПКТ. Там таксама было нясоладка».
У зняволенні ў мужчыны пачаліся праблемы са здароўем, на холадзе застудзіў мачавы пухір.
«Скоцкія ўмовы», — кажа Сенік пра ўмовы за кратамі.
Сенік расказаў таксама, што ў калоніі вязні рабілі скрыні для снарадаў і куляў.
«Працуюць пад прыкрыццём, нібыта беларускі бок замаўляе, а не Расія. І вельмі вялікімі партыямі. Зразумела, што столькі Беларусі не трэба», — падзяліўся ён.
Пра тое, што ў папраўчых калоніях арганізавана вытворчасць драўляных скрынь для транспартавання гатовых боепрыпасаў, паведамляў і «Белпол».
Максіма Сеніка затрымалі 10 студзеня 2022 года. Ён быў сябрам незалежнага прафсаюза «Гродна Азот». Затрымалі мужчыну за ўдзел у акцыях пратэсту ў 2020 годзе і за рэпосты ў сацыяльных сетках. Яго абвінавацілі паводле некалькіх артыкулаў Крымінальнага кодэкса — «абраза Аляксандра Лукашэнкі» (ч. 1 арт. 368), «спрыянне экстрэмісцкай дзейнасці» (ч. 1 арт. 361‑4 і ч. 1 арт. 361-2). Сеніку далі 4 гады калоніі. Мужчына быў у калоніі №2 у Бабруйску. На волю ён выйшаў 13 снежня ў складзе групы з іншымі палітвязнямі.
Цяпер чытаюць
Віцебскі вядучы пажартаваў на закрытым мерапрыемстве. Праз дзве гадзіны да яго прыехала міліцыя праз данос20
Віцебскі вядучы пажартаваў на закрытым мерапрыемстве. Праз дзве гадзіны да яго прыехала міліцыя праз данос
«Доктарка», адвакат, чалавек з камерай і некалькі дужых хлопцаў. У Петрапаўлаўскай Баршчагоўцы расійскія спецслужбы скарысталіся спецыфічным украінскім бізнэсам ваеннага часу1313
Каментары