Для кіравання пчалой кантролер ужыўляецца непасрэдна ў мозг. Такая распрацоўка можа рэвалюцыянізаваць сферу разведкі і дапамагчы выратаваць людзей пасля катастрофаў.
Як паведамляе The Telegraph, каманда кітайскіх навукоўцаў пад кіраўніцтвам прафесара Чжао Цзеляна з Пекінскага тэхналагічнага інстытута распрацавала самы лёгкі ў свеце кантролер мозгу, які важыць усяго 74 міліграмы — менш, чым драбінка солі.
Прылада мацуецца на спіне пчалы, тры іголкі, падлучаныя да прылады, уводзяцца ў мозг пчалы, што дазваляе накіроўваць насякомае ў пэўным кірунку.
Эксперыменты паказалі, што пчолы выконваюць загады з 90-працэнтнай дакладнасцю. Такім чынам, навукоўцы атрымалі магчымасць дыстанцыйна кіраваць палётам жывога арганізма.
Мікрапрылады можна дапоўніць відэакамерамі, мікрафонамі і сэнсарамі, што ператворыць кіраваную пчалу ў перасоўную разведвальную платформу. Яна здольная пранікаць у месцы, недаступныя для людзей або робатаў, і збіраць інфармацыю, не выклікаючы падазрэнняў.
«Біяробаты на аснове насякомых захоўваюць рухомасць, здольнасць да маскіроўкі і адаптацыі да асяроддзя, характэрныя для іх прыродных прататыпаў», — пішуць аўтары ў артыкуле, апублікаваным у Chinese Journal of Mechanical Engineering.
«У параўнанні з штучнымі робатамі яны маюць лепшую скрытнасць і большую аўтаномнасць, што робіць іх надзвычай каштоўнымі ў тайных разведвальных аперацыях, барацьбе з тэрарызмам і наркатрафікам, а таксама пры правядзенні выратавальных аперацый у зоне стыхійных бедстваў».
Раней навукоўцы ўжо праводзілі эксперыменты з жукамі, на якіх устанаўлівалі чыпы і кіравалі імі з дапамогай інфрачырвонага выпраменьвання або Bluetooth. Адзін з такіх «заплечнікаў» важыў усяго 23 міліграмы — у тры разы менш, чым кантролер для пчалы.
Аналагічныя праекты распрацоўваюць у Сінгапуры, дзе кіберкантролеры мацавалі да прусакоў. Такіх кіраваных насякомых выкарыстоўвалі ў аперацыях па выратаванні людзей пасля землятрусу ў М’янме.
Кітай — не адзіная краіна, якая інвестуе ў стварэнне кібернасякомых. У гэтым напрамку працуюць таксама навукоўцы ЗША і Японіі.
Аднак, нягледзячы на поспехі, праблемы застаюцца. Найбольш значная з іх — абмежаваная ёмістасць батарэй: калі павялічыць іх, пчала не зможа падняць цяжар. Акрамя таго, прылады складана адаптаваць да розных відаў насякомых, бо кожны з іх рэагуе на сігналы ў розных частках цела.
Між тым Кітай працягвае мініяцюрызацыю тэхналогій. Так у чэрвені былі прадстаўлены дроны памерам з камара.
Цяпер чытаюць
Выйшаў на свабоду былы топ-журналіст АНТ Дзмітрый Семчанка7
Каментары