У Фінляндыі затрымалі былога вагнераўца, які прасіў прытулку. Ён ваяваў у Бахмуце
Раней гэты Яўген даваў інтэрв'ю расійскім прапагандыстам і сцвярджаў, што добраахвотна паехаў ваяваць у 2022 годзе.
На тэрыторыі Фінляндыі затрымалі былога найміта расійскай прыватнай вайсковай кампаніі «Вагнер», які папрасіў прытулку ў краіне. Пра гэта гаворыцца ў публікацыі Yle, паведамляе «Еўрапейская праўда».
Фінская памежная служба раней паведамляла пра мужчыну, які 17 чэрвеня перасёк мяжу паблізу горада Кітэі ў Паўночнай Карэліі. Паводле інфармацыі Yle, пацверджанай некалькімі крыніцамі, мужчына — расійскі вайсковец Яўген.
Мужчына перасёк фінскую мяжу ў раёне Вяліваара. Гэты ўчастак размешчаны ў лясістай мясцовасці і не перагароджаны памежным плотам.
Паводле звестак Yle, памежнікі знайшлі мужчыну дзякуючы спрацоўванню датчыкаў і затрымалі яго адразу пасля перасячэння мяжы.
Ён папрасіў у Фінляндыі міжнароднай абароны і цяпер знаходзіцца ў цэнтры часовага ўтрымання.
Расеец публікаваў у сацсетках фатаграфіі і відэазапісы, якія пацвярджаюць яго ўдзел у вайне супраць Украіны. На некаторых з гэтых матэрыялаў бачная нашыўка «Вагнера» на яго форме.
У інтэрв'ю расійскім прапагандысцкім каналам Яўген расказваў пра баі ва Украіне і сцвярджаў, што добраахвотна ўступіў у войскі РФ у 2022 годзе, прайшоў падрыхтоўку ў складзе «Вагнера» і ўдзельнічаў у аперацыях у Бахмуце.
У адным з інтэрв'ю Яўген расказвае, як ягонае падраздзяленне знішчыла аўтамабіль з украінскімі вайскоўцамі ў Селідаве.
З восені 2024 года ён знік з публічнага поля, а ўжо ў лютым 2025 года апублікаваў відэа, у якім рэзка раскрытыкаваў расійскае камандаванне.
30 чэрвеня Яўген зноў апублікаваў у сацсетцы «Укантакце» відэа з крытыкай расійскага вайсковага кіраўніцтва. Па даных Yle, на момант публікацыі гэтага відэа мужчына ўжо знаходзіўся ў Фінляндыі.
Цэнтральная крымінальная паліцыя праводзіць папярэднюю праверку ў дачыненні да яго. Падчас праверкі паліцыя ацэньвае, ці ёсць падставы для пачатку крымінальнага расследавання.
На дадзены момант фінскія ўлады не падазраюць Яўгена ў здзяйсненні ваенных злачынстваў.
У сакавіку акруговы суд Хельсінкі прызнаў заснавальніка і былога камандзіра вайсковай групоўкі «Русіч» Воіслава Тордэна (Яна Пятроўскага) вінаватым ва ўчыненні ваенных злачынстваў ва Украіне і прысудзіў яго да пажыццёвага зняволення.
У лютым мінулага года Тордэна прысудзілі ў Фінляндыі да двух гадоў турэмнага зняволення за двухразовае парушэнне забароны на ўезд.
«Вагнер» завербаваў людзей у Лондане, каб тыя выкралі расійскага бізнэсмена Чычваркіна. Адзін з іх перапісваўся з «Minsk KGB»
«Са 100 штурмавікоў у жывых засталіся толькі 8». Вагнеравец расказаў пра маштаб страт у баях на мяжы з Украінай
У фінскім серыяле расіяне высаджваюць дэсант з самалёта «Белавія». Што робяць Суомі?
«Да лейтэнанта прыехала маладая жонка, пабачыла, што адбываецца ў зоне, і застрэлілася». Выйшла заключная частка ўспамінаў Рыгора Бярозкіна пра ГУЛАГ і савецкі Мінск77
Каментары
[Зрэдагавана]