Кіраўнік Паўночнай Карэі Кім Чэн Ын пацвердзіў гатоўнасць аказваць поўную і безумоўную падтрымку Расіі ў вайне супраць Украіны. Пра гэта ён заявіў пасля сустрэчы з міністрам замежных спраў РФ Сяргеем Лаўровым, якая адбылася 12 ліпеня ў паўночнакарэйскім горадзе Вансан, паведамляе The Moscow Times.
Паводле слоў Кіма, дапамога будзе аказвацца на падставе дамовы аб стратэгічным партнёрстве, якую краіны падпісалі ў чэрвені 2024 года.
Таксама паўночнакарэйскі лідар перадаў «цёплае прывітанне» прэзідэнту Расіі Уладзіміру Пуціну і выказаў упэўненасць у яго «перамозе» над Украінай, падкрэсліўшы поўную салідарнасць у «стратэгічных пытаннях». Кім адзначыў, што КНДР і Расія будуць разам адстойваць свае інтарэсы і развіваць супрацоўніцтва.
Лаўроў у адказ падзякаваў Кіму за «вайсковую дапамогу», у тым ліку за накіраванне салдат. Ён назваў адносіны паміж краінамі «непераможным баявым братэрствам».
Паводле звестак разведкі Паўднёвай Карэі, Пхеньян рыхтуецца адправіць у Расію яшчэ каля 25—30 тысяч вайскоўцаў ужо ў ліпені ці жніўні. Раней у 2024 годзе Паўночная Карэя ўжо накіроўвала прыкладна 11—13 тысяч салдат, з якіх каля 4 тысяч загінулі або былі параненыя, сцвярджаюць заходнія крыніцы.
Акрамя салдат, КНДР перадала Расіі больш за 12 мільёнаў снарадаў. Усё гэта адбываецца на фоне таго, што Пуцін, паводле паведамленняў, разлічвае на хуткі прарыў украінскай абароны. Аднак жа, нягледзячы на некаторы прагрэс на фронце, прасоўванне расійскіх войскаў па-ранейшаму складае не больш за 15 км² у дзень і суправаджаецца вялікімі стратамі.
Так, толькі з 1 мая да 9 ліпеня, паводле The Economist, Расія магла страціць каля 31 тысячы забітых. Агулам, па ацэнках заходніх спецслужбаў, з пачатку вайны Расія страціла ад 900 тысяч да 1,3 мільёна вайскоўцаў, з іх да 350 тысяч — беззваротна. Нават з сённяшнімі тэмпамі наступу, каб цалкам захапіць Украіну, расійскай арміі можа спатрэбіцца яшчэ амаль 90 гадоў.
Чамаданава хоча супрацоўнічаць з партыяй Кім Чэн Ына
У КНДР паказалі цырымонію развітання з вайскоўцамі, што загінулі ў Расіі. Удзельнічаў сам Кім Чэн Ын
КНДР адкрыла курорт «сусветнага класа». Ён можа быць арыентаваны на расійскіх турыстаў ФОТЫ
КНДР можа накіраваць у Расію 25000 чалавек на заводы па вытворчасці дронаў
У КНДР з другой спробы ўсё ж спусцілі на ваду скандальны вайсковы карабель
Каментары