Расійскі АўтаВАЗ назваў цэны на новы аўтамабіль Lada Iskra, які быў упершыню прадстаўлены ў студзені 2025 года. Гэтая мадэль задумвалася як даступная замена для ўжо састарэлай лінейкі Granta, але ў выніку заняла прамежкавае месца паміж Vesta і Granta, паведамляе Autonews.ru.
Серыйную вытворчасць Iskra пачалі ў красавіку, адначасова стартаваў прыём перадзамоў. У продаж паступяць тры варыянты кузава: седан, універсал і кросверсія. Усе будуць з рухавікамі аб’ёмам 1,6 літра, магутнасцю ад 90 да 106 конскіх сіл, з механічнай або аўтаматычнай каробкай перадач.
Па памерах Iskra блізкая да Granta і Renault Logan III, але крыху меншая за Vesta. Знешне яна вельмі нагадвае «старэйшую» мадэль — тыя ж выштампоўкі на баках і «бумерангі» на бамперы. Плануецца сем колераў: сіні, белы, чорны, цёмна-чырвоны, срэбны, карычневы і аранжавы.
Аўтамабіль будзе выпускацца ў чатырох камплектацыях: Comfort, Life, Enjoy і Techno. Цэны — ад 1,249 да 1,579 мільёна расійскіх рублёў (прыкладна ад $16 000 да $20 000). Афіцыйны старт продажаў у Расіі — 20 ліпеня.
У Беларусі Lada займае другое месца па продажах сярод аўтамабільных брэндаў, з доляй каля траціны рынку. У лютым 2025 года брэнд пачаў прадаваць у Беларусі бізнэс-седан Lada Aura.
Цяпер чытаюць
«Цяпер мне чужая сама канцэпцыя ўжыць нешта, чаго ты не ведаеш». Вялікая гутарка з Іванам Шылам пра бізнэс, зараблянне з дапамогай ШІ, жанчын і ботакс9
Каментары