Брытанія заявіла, што ГРУ задоўга да атручвання Юліі Скрыпаль узламала яе імэйл
За пяць гадоў да замаху на былога супрацоўніка ГРУ Сяргея Скрыпаля расійская ваенная разведка ўзламала электронную прыладу яго дачкі Юліі, якая падверглася атручванню ў Солсберы ў 2018 годзе разам з бацькам. Пра гэта згадваецца ў абвестцы ўрада Вялікабрытаніі аб чарговых санкцыях супраць Расіі, піша Бі-бі-сі.
У пятніцу ў брытанскі санкцыйны спіс былі ўнесены тры структурныя падраздзяленні ГРУ і 18 яе афіцэраў. У іх лік увайшлі Іван Ермакоў, Аляксей Лукашаў і 85-ы галоўны цэнтр спецыяльнай службы ГУ ГШ, ён жа в/ч 26165, у якой, як сцвярджаецца, служаць абодва згаданыя супрацоўнікі.
Як сказана ў заяве Міністэрства замежных спраў Вялікабрытаніі з гэтай нагоды, «сённяшнія дзеянні таксама ўдарылі па афіцэрах ваеннай разведкі ГРУ, адказных за мінулы ўзлом прылады Юліі Скрыпаль шкоднасным праграмным забеспячэннем, вядомым як X-Agent, за пяць гадоў да няўдалага замаху агентаў ГРУ на забойства Юліі і Сяргея Скрыпалёў смяротным нервова-паралітычным ядам «Навічок» у Солсберы».
У заяве не ўдакладняецца тып узломанай прылады. У больш падрабязнай даведцы згадваецца, што ўзлом у 2013 годзе быў трансгранічным і закранаў электронную пошту Скрыпаль.
Запісы пра Ермакова і Лукашава ў санкцыйным спісе незвычайна сціплыя на падрабязнасці, там не пазначаны іх нумары пашпартоў, адрасы і нават рускае напісанне імёнаў. Сяргей Скрыпаль, асуджаны ў Расіі за дзяржаўную здраду ў 2004 годзе, у 2010 годзе быў абмяняны на расійскіх шпіёнаў, арыштаваных у ЗША, і абаснаваўся ў Солсберы на паўднёвым захадзе Англіі. У сакавіку 2018 года яго і дачку, якая прыехала да яго з Расіі, знайшлі без прытомнасці. Улады Вялікабрытаніі заявілі, што Скрыпалі падвергліся атручванню нервова-паралітычным ядам «Навічок», які нанеслі на дзвярную ручку засланыя агенты ГРУ. Таксама ад атручвання ў тыя дні пацярпелі паліцэйскі і людзі, якія выпадкова паднялі флакон, у якім знаходзіўся яд, адна жанчына, Дон Стэрджэс, памерла.
Самі Скрыпалі выжылі, але з моманту замаху не з’яўляліся на публіцы, што тлумачыцца захаваннем пагрозы іх жыццю. На грамадскіх слуханнях аб акалічнасцях смерці Дон Стэрджэс летась Сяргей Скрыпаль выступіў з пісьмовымі паказаннямі.
Расія шмат разоў адмаўляла сваю датычнасць да таго, што адбылося ў Солсберы. Заяў аб новых санкцыях і аб узломе прылады Юліі Скрыпаль Масква пакуль не рабіла.
Цяпер чытаюць
Хто такі Міхаіл Мяховіч — сілавік, які вядзе канал ГУБАЗіКа і адказвае за прабіў людзей19
Каментары