У элітным квартале ў цэнтры Мінска прапанавалі яшчэ партыю кватэр. Цана квадрата ўражвае
У раёне плошчы Перамогі ў Мінску працягваецца будаўніцтва жылога комплексу «Дэпо». Элітныя метры ў закрытым ЖК каштуюць нямала. Нядаўна забудоўшчык прапанаваў кватэры ў доме, што будуецца, за 6500 даляраў, а сёння ў газеце «Звязда» з’явілася праектная дэкларацыя на жыллё з цаной ужо ў 6700 долараў за квадратны метр, піша Realt.by.
Участак у цэнтры Мінска, дзе раней было тралейбуснае дэпо, кампанія «А-100 Дэвелапмент» набыла з аўкцыёну ў 2017 годзе. За зямлю забудоўшчык заплаціў больш за 8 мільёнаў даляраў. Амаль столькі ж кампанія патраціла на знос старых пабудоў і дэмантаж інжынерных сетак.
У 2019 годзе забудоўшчык прадставіў праект жылога комплексу, які распрацаваў вядомы расійскі архітэктар Сяргей Скуратаў, а ўжо праз год на месцы былога дэпо закіпела будоўля. Сёння 4 дамы ў элітным комплексе ўжо здадзены, яшчэ некалькі будынкаў знаходзяцца ў працэсе будаўніцтва.
У апублікаванай дэкларацыі гаворка ідзе пра дзявятую чаргу будаўніцтва. Зараз тут узводзяць дом № 9.2.
Маналітна-каркасны жылы дом пад назвай Tatra 2 будзе мець 6 паверхаў. На першым паверсе размесціцца фітнэс-прастора, якая будзе даступнай 24/7 толькі для жыхароў квартала. Усяго ў доме запраектавана 26 кватэр. На верхніх паверхах будуць адна– і двухузроўневыя пентхаусы з максімальнай вышынёй столяў 7,8 метра.
Здаць жылы дом плануецца ў 2026 годзе. Зараз далевікам прапануюць 26 кватэр плошчай ад 48 да 146 квадратных метраў. Кошт аднаго квадрата складае 6700 даляраў (па курсе Нацбанка). Атрымліваецца, што кошт самай невялікай кватэры складзе 321 тысячу даляраў, а самай прасторнай — каля 978 тысяч даляраў.
Паводле дамоўленасці бакоў, далявік можа атрымаць зніжку: яна будзе залежаць ад плошчы кватэры, планіроўкі, паверху, першапачатковага ўзносу і графіка плацяжоў.
Увесь жылы комплекс «Дэпо» будзе складацца з 21 дома і больш чым 500 кватэр. У квартале з’явіцца пешаходная вуліца, штучны сажалка, супермаркет, крамы, рэстараны, кавярні, фітнес-клуб і прыватны дзіцячы сад.
Каментары