Курманбек Бакіеў звярнуўся са сталіцы Беларусі да сусветнай супольнасці. Меры перасцярогі вакол будынка Выканкама СНД былі прынятыя надзвычайныя.
21 красавіка ў Выканкаме СНД у Мінску экс‑прэзідэнт Кыргызстана Курманбек Бакіеў, які зараз разам з сям’ёй знаходзіцца ў Беларусі, звярнуўся да сусветнай супольнасці і народа Кыргызстана.
Зварот доўжыўся роўна чатыры хвіліны, а меры перасцярогі былі прынятыя надзвычайныя.
Квартал перад будынкам СНД — на рагу вуліц Кірава і Камсамольская, насупраць стадыёна «Дынама» — быў ачэплены міліцыяй, усе аўтамабілі эвакуяваныя, міліцыянеры з сабакамі і мінашукальнікамі шукалі выбухоўку. Прысутнічалі міліцыянеры з сабакамі і ў самім будынку.
Зварот Бакіева ўтрымліваў восем пунктаў.
Экс‑прэзідэнт заявіў, што не прызнае сваёй адстаўкі.
«Мой народ перажывае страшную трагедыю, -- з гэтых словаў Курманбек Бакіеў пачаў свой зварот да сусветнай супольнасці. — Банда самаўладцаў аб’явіла сябе ўладай. Гвалт становіцца нормай жыцця. Краіна адкінутая на дзесяткі гадоў назад»,-- такім чынам ахарактэрызаваў К.Бакіеў тое, што зараз адбываецца ў Кыргызстане. Ён таксама прызнаў, што як прэзідэнт Кыргызстана не можа зняць з сябе адказнасці за гэта і гатовы адказваць перад законам, але таксама не мае намеру здавацца «бандзе бандытаў».
Затым Курманбек Бакіеў звярнуўся да сусветнай супольнасці, кіраўнікоў краін СНД і народу Кыргызстана. Зварот складаўся з васьмі пунктаў.
У першым К.Бакіеў выказаў спачуванні сем’ям і блізкім загінулых падчас змены ўлады ў Кыргызстане . У другім паведаміў, што не прызнае сваёй адстаўкі і паабяцаў праз некаторы час патлумачыць гэта.
«10 месяцаў таму народ Кыргызстана абраў мяне прэзідэнтам. Зараз толькі смерць спыніць мяне. Я законны прэзідэнт, прызнаны сусветнай супольнасцю», -- заявіў ён.
У трэцім пункце сваёй заявы К. Бакіеў назваў сённяшнія ўлады Кыргызстана нелегітымнымі і выказаў упэўненасць, што змена ўлады ў Бішкеку арганізаваная звонку. «Кыргызстан не стане калоніяй. Мой народ жадае быць свабодным і стане свабодным. Ён працягне пабудову сучаснай незалежнай дзяржавы», -- заявіў К.Бакіеў.
Затым былы кіраўнік Кыргызстана нагадаў аб ўведзеным 7 красавіка надзвычайнага становішча ў краіне і паабяцаў, што ўсе, хто парушыў яго будуць пакараныя.
«Я заклікаю сусветную супольнасць не прызнаваць банды легітымнай уладай. Не стварайце прэцэдэнта. Я настойваю на правядзенні незалежнага міжнароднага разследвання і пакаранні вінаватых у гібелі людзей», -- заявіў Курманбек Бакіеў.
Звярнуўся ён таксама і да кіраўнікоў краін СНД: «Нашай свабодзе і незалежнасці больш за два дзесяткі гадоў, не адступайце перад грубай сілай, вы адказваеце за свой народ».
На завяршэнне сваёй заявы Курманбек Бакіеў звярнуўся да народу Кыргызстана. «У нас ёсць сябры і іх шмат. Мы не адны. Мы можам абаперціся на іх у цяжкую хвіліну і уратаваць краіну ад вялікай бяды».
Скончыў сваю заяву К.Бакіеў абяцаннямі зрабіць усё, каб вярнуць Кыргызстан у канстытуцыйны лад. «Я перакананы ў жаданні майго народа пераадолець смуту», – заявіў Курманбек Бакіеў.
* * *
Пра тое, што Бакіеў разам з сям'ёй знаходзіцца ў Мінску стала вядома ў аўторак падчас выступу А. Лукашэнкі ў беларускім парламенце. Кіраўнік Беларусі заявіў, што Бакіеў прыляцеў у Мінск у панядзелак на яго запрашэнне.
Каментары