У Мінску 86‑гадовая кіроўца на «Запарожцы» збіла 89‑гадовую жанчыну на пераходзе і паехала. Зараз яе будуць судзіць
На разгляд у суд накіравана крымінальная справа ў адносінах да 86‑гадовай жанчыны, якая збіла пешахода і з'ехала з месца ДТЗ, расказалі Мінск-Навінам у пракуратуры Мінска.
Здарэнне адбылося 2 ліпеня каля 20:50, жанчына на «Запарожцы» ехала па другой паласе праезджай часткі вул. Захарава ў напрамку вул. Андрэеўскай.
Пры выбары хуткасці пенсіянерка не ўлічыла інтэнсіўнасць руху і дарожныя ўмовы, і не ўступіла дарогу 89‑гадовай жанчыне, якая пераходзіла дарогу па «зебры», і здзейсніла наезд.
Пасля кіроўца з'ехала з месца здарэння, пакінуўшы пацярпелую без дапамогі. Хуткую медыцынскую дапамогу той выклікалі відавочцы.
Высветлілася, што пешаходу былі прычынены траўмы, якія, згодна з заключэннем эксперта, адносяцца да катэгорыі менш цяжкіх цялесных пашкоджанняў.
У адносінах да вінаватай аварыі распачалі крымінальную справу адразу па двух артыкулах Крымінальнага кодэкса. Вядома, што яе аўтамабіль знаходзіўся ў тэхнічна спраўным стане, стаж пенсіянеркі — з 1991 года, аднак у яе адсутнічала медыцынская даведка аб стане здароўя — тэрмін яе дзеяння скончыўся ў 2019 годзе.
У ходзе следства жанчына распавяла, што бачыла пацярпелую на пешаходным пераходзе, але лічыла, што паспее праехаць. Услыхаўшы гук шкла, абвінавачаная палічыла, што зачапіла правай пярэдняй часткай аўтамабіля толькі сетку, якая была ў руках у пацярпелай. Пасля яна прыехала да свайго дому, запаркавала ЗАЗ, а неўзабаве ёй патэлефанавалі з міліцыі.
— Абвінавачаная мае вышэйшую адукацыю, з’яўляецца інвалідам III групы па агульным захворванні, раней да крымінальнай адказнасці не прыцягвалася, — пракаментавала старэйшы пракурор аддзела па наглядзе за выкананнем заканадаўства ўпраўлення Следчага камітэта Беларусі па г. Мінску пракуратуры г. Мінска Марына Далінкевіч.
— Ёй выстаўлена абвінавачванне ў здзяйсненні злачынстваў, прадугледжаных ч. 1 арт. 317 («Парушэнне правіл дарожнага руху або эксплуатацыі транспартных сродкаў») і ч. 3 арт. 159 КК («Пакіданне ў небяспецы»). Віну грамадзянка цалкам прызнала, у здзейсненым раскаялася. У адносінах да яе ўжыта мера стрымання ў выглядзе забароны кіравання транспартным сродкам.
Цяпер чытаюць
Польскі блогер наведаў Беларусь — некаторыя яго высновы вас здзівяць19
Каментары