Па кнізе беларускі, якая стала бестселерам у нас і ў Расіі, здымуць фільм
Ужо прададзена тры мільёны экземпляраў гэтага псіхалагічнага нон-фікшна.
Кніга беларускай пісьменніцы і журналісткі Вольгі Прымачэнкі «Пяшчотна да сябе» («К себе нежно») стала бестселерам. У ёй расказваецца, як любіць сябе, прымаць свае пачуцці, расстаўляць прыярытэты. Цяпер па кнізе здымуць фільм у Расіі.
Расійская выдавецкая група «Эксмо» і прадзюсарскі цэнтр «Яндэкса» «Плюс студыя» падпісалі пагадненне аб сумесным інвеставанні ў вытворчасць фільма, паведамляюць «Ведомости».
Здымкі пачаліся ў жніўні 2025 года, жанр стваральнікі вызначылі як «жыццесцвярджальная камедыя». Рэжысёрам фільма стаў Іван Кітаеў («Без правілаў», «Былыя»), а сцэнарыстам — Дар'я Грацэвіч («Здрады», «Халоп»). Ролі ў карціне выканаюць Карына Разумоўская, Арцём Ткачэнка, Пелагея Неўзорава, Вольга Медыніч.
Паводле сюжэту фільма, паспяховая доктарка Надзя да сваіх 40 гадоў раптам разумее, што зусім нічога не ведае пра сябе. Жанчына адна выхоўвае дачку Алівію і жыве ў кватэры свякрухі, муж Надзі Барыс сышоў ад яе два гады таму. І ў гэты момант яна атрымлівае «шэсць урокаў пяшчотнасці», якія дапамагаюць Надзі «зноў адшукаць сябе, свой уласны голас і сваю новую надзею», адзначаецца ў рэлізе «Эксмо».
Выхад фільма запланаваны на красавік 2026 года.
Псіхалагічны нон-фікшн «Пяшчотна да сябе» быў выдадзены ў 2020 годзе. Гэтая кніга не раз станавілася лідарам продажаў у Беларусі і Расіі. Пазней яна выйшла і па-беларуску.
Сукупная рэалізаваная колькасць кніг (папяровых, электронных і аўдыёкніг), па звестках выдавецтва «Эксмо», ужо перавысіла 3 млн асобнікаў.
Вольга Прымачэнка пасля напісала таксама кнігі «З табой я дома» і «Усё скончыцца, а ты не», якія таксама сталі папулярныя. «З табой я дома» выдадзена і па-беларуску.
-
Серыял «Pluribus» — самы няправільны постапакаліпсіс ці нешта большае? Расказваем пра смелы мысленчы эксперымент на ТБ
-
У Беларусь завезлі «Чабурашку 2». Паглядзелі гэты расійскі хіт, каб вам не прыйшлося
-
Netflix расказаў пра неверагодны поспех серыяла «Вельмі дзіўныя справы». Серыял уплывае на ўсе сферы жыцця
Каментары
З крытыкай крытыкі расейшчынай згодны.
1) Прапанаваць адказ у крызіс сярэдняга ўзросту і
2) Каб той адказ быў парадаксальна прыемным і не цяжкім, напрыклад, "што з'есці каб пахудзець" або "ты недастаткова сябе любіш!"