Фільм «Шалёнае спатканне» пасуе сямейным парам, якія на 20-годдзе вяселля, вырашылі схадзіць у кінатэатр.
«Шалёнае спатканне» (Date Night)
ЗША, 2010, каляровы, 88 хв.
Рэжысёр: Шон Леві
Ролі выконваюць: Стыў Карэл, Ціна Фэй, Марк Ўолберг, Тараджы П.Гэнсан
Жанр: Камедыйна-рамантычны трымценнік
Адзнака: 5 (з 10)
Ціхія супругі Фостэр, якія пачынаюць нудзіцца адзін з адным, ідуць у модную рэстарацыю. Каб атрымаць столік, героі выдаюць сябе за іншых людзей. І дарэмна! Цяпер за самазванцамі палююць мафія і паліцыя.
Рэжысёр Шон Леві, які раней паставіў «Ноч у музеі», — не хапае зорак з неба. Карціна шараговая дый сціплая, як і самі героі. Немашака й тлумных зорак, акрамя Марка Ўолберга, які нахабна дэманструе фізічныя формы.
Але ў гэтым фільме — «каму за трыццаць», адсутнічаюць маладзёвыя сарцірныя жарты, брутальныя сцэнкі і натужлівае камікаванне.
Самае важнае — звычайныя чалавечыя пачуцці ў незвычайных умовах крымінальных прыгодаў. І вось ужо да сямейных сцэнак двух недарэкаў далучаюцца махляры-шантажысты, таксісты і мафіёзнікі, каб падзяліцца ўласным багатым досведам. Герой-цюхця пагражае пісталетам, матуля дваіх дзяцей гойсае на абцасах, ляцяць у ваду крадзеныя машыны. Мафія і прадажныя палітыкі — у шоку ад хэпі-энда.
Карціна пасуе сямейным парам, якія на 20-годдзе вяселля, вырашылі схадзіць у кінатэатр.
Цяпер чытаюць
«Напісалі, як я хачу вярнуцца ў святую Расію». Прапаганда перакруціла жарт беларускі і прыдумала фэйк пра загніваючую Амерыку1
Каментары