Еўракамісія прадставіла прапановы па 20‑м пакеце санкцый супраць Расіі. Яго маюць прыняць да гадавіны вайны

Як заявіла старшыня Еўракамісіі Урсула фон дэр Ляен, новы пакет таксама прадугледжвае пашырэнне спіса так званага ценявога флоту — у яго дадалі яшчэ 43 судны, а агульная іх колькасць дасягнула 640. Акрамя таго, для Расіі плануюць ускладніць набыццё танкераў. Уводзяцца шырокія абмежаванні на тэхнічнае абслугоўванне і іншыя паслугі для ЗПГ-танкераў і ледаколаў, што павінна знізіць магчымасці расійскіх газавых экспартных праектаў.

Другі блок санкцый накіраваны на ўзмацненне ціску на банкаўскую сістэму Расіі. Пад абмежаванні маюць трапіць яшчэ 20 рэгіянальных банкаў, а таксама крыптавалютныя структуры, кампаніі і платформы, якія выкарыстоўваюцца для абыходу санкцый. Меры таксама закрануць банкі ў трэціх краінах, што дапамагаюць незаконна гандляваць санкцыйнымі таварамі.

Трэці блок прадугледжвае далейшае ўзмацненне гандлёвых абмежаванняў. ЕС збіраецца ўвесці новыя забароны на экспарт тавараў і паслуг — ад гумы і трактароў да паслуг у сферы кібербяспекі — на суму больш за 360 мільёнаў еўра. Адначасова ўводзяцца дадатковыя імпартныя абмежаванні на металы, хімічную прадукцыю і крытычна важныя мінералы на суму звыш 570 мільёнаў еўра, а таксама новыя забароны на пастаўкі тавараў і тэхналогій вайсковага прызначэння, у тым ліку матэрыялаў для вытворчасці выбуховых рэчываў. Прапануецца таксама вызначыць квоту на імпарт аміяку.

Упершыню Еўрасаюз плануе задзейнічаць спецыяльны механізм супраць абыходу санкцый, забараніўшы экспарт станкоў з лічбавым праграмным кіраваннем і радыёстанцый у краіны з высокай рызыкай іх рээкспарту ў Расію.

Акрамя таго, Еўракамісія прапануе ўзмацніць прававую абарону кампаній ЕС ад парушэнняў правоў інтэлектуальнай уласнасці і несправядлівай экспрапрыяцыі ў Расіі ў сувязі з санкцыйнай палітыкай.

Асобна падкрэсліваецца, што для ўвядзення пакета санкцый неабходная згода ўсіх краін — членаў Еўрапейскага саюза.

Важным элементам новага пакета можа стаць замена цэнавай «столі» на нафту поўнай забаронай марскіх паслуг. З такой ініцыятывай раней выступілі Швецыя і Фінляндыя, прапанаваўшы забараніць страхаванне, фінансаванне і брокерскія паслугі для суднаў, якія перавозяць расійскія энерганосьбіты. Паводле іх ацэнак, гэта істотна павялічыць транспартныя выдаткі Расіі і выключыць удзел еўрапейскіх кампаній у гэтым гандлі.

Фон дэр Ляен прапануе ўводзіць гэтыя меры ў каардынацыі з краінамі G7. У такім выпадку дзейны цэнавы ліміт на нафту страціць ключавое значэнне, а галоўным інструментам кантролю стане менавіта забарона на марскія паслугі.

Паводле даных шведскага ўрада, на кастрычнік 2025 года толькі каля 35% суднаў, што перавозілі расійскую нафту, дзейнічалі ў межах цэнавага абмежавання, у той час як астатнія 65% належалі да «ценявога флоту».

Раней Урсула фон дэр Ляен заяўляла, што мэта 20‑га пакета санкцый — узмацніць ціск на Маскву, каб прымусіць яе сесці за стол перамоў з рэальным намерам дасягнуць міру.

• 5
• 0
• 0
• 0
• 0
• 0
• 0
• 0