Разжалаваны дэкан з юрфака БДУ Шыдлоўскі знайшоўся ў нечаканым месцы
Кандыдат юрыдычных навук, дацэнт БДУ Андрэй Шыдлоўскі, які аддаў універсітэту 27 год жыцця (але ўзляцеў толькі пасля палітычных чыстак у 2021-м) і быў ціха выстаўлены за вароты праз падазрэнні ў карупцыі, адшукаў новую работу — у дарожна-будаўнічым трэсце.
Прозвішча Андрэя Шыдлоўскага з'явілася на сайце мінскага Дарожна-будаўнічага трэста №5.
Кампанія ўваходзіць у холдынг «Белаўтадор», займаецца будаўніцтвам дарог і шмат гадоў стабільна стратная. У трэсце станам на пачатак 2026 года працуюць 606 чалавек — у 2021 было 780.
Андрэй Шыдлоўскі стаў там намеснікам дырэктара па юрыдычных пытаннях.
З ягоным прыходам колькасць супрацоўнікаў арганізацыі, якія маюць другую ступень вышэйшай адукацыі, вырасла мінімум на 15% паводле ўнутранай статыстыкі.
Фота новага менеджара яшчэ не загрузілі на сайт арганізацыі, таму можна зрабіць выснову, што ўладкаваны Шыдлоўскі нядаўна. Прынамсі пару месяцаў сядзеў без работы пасля сваёй бясслаўнай адстаўкі з юрыдычнага факультэта БДУ — без урачыстага развітання і без кветак.
Нагадаем, мінімум са снежня 2025‑га Андрэй Шыдлоўскі не дэкан юрыдычнага факультэта БДУ, які ўзначаліў у разгар палітычных чыстак у 2021-м.
Ціха зняты, Шыдлоўскі таксама вылецеў з акадэмічнай сферы, у якой працаваў усё дарослае жыццё.
Па меркаванні, прынятым на самім юрыдычным факультэце, кар'ера дэкана-даносчыка скончылася ў моманце, калі на яго ўласныя фінансавыя эксперыменты з бухгалтэрыяй факультэта данеслі пакрыўджаныя.
Чытайце таксама: «Атачыў сябе даносчыкамі». Расказваем пра дэкана юрфака БДУ, са студэнтам якога двойчы запісалі відэа ў духу сілавікоў
***
Андрэй Шыдлоўскі ў 1998 годзе з адзнакай скончыў юрыдычны факультэт БДУ, у 2002‑м абараніў дысертацыю на тэму «Інстытут прызначэння пакарання ў крымінальным праве Рэспублікі Беларусь: сістэмна-функцыянальны аналіз».
Доўгі час Шыдлоўскі быў намеснікам дэкана юрфака БДУ па вучэбна-выхаваўчай частцы (з 2006‑га да 2020-га). Пасля год займаў пасаду першага намесніка дырэктара Інстытута перападрыхтоўкі і павышэння кваліфікацыі суддзяў, работнікаў пракуратуры, судоў і ўстаноў юстыцыі БДУ. А ў верасні 2021‑га вярнуўся на юрфак, ужо дэканам. Ён замяніў Таццяну Міхалёву, якая хоць і ўдзельнічала ў рэпрэсіях супраць студэнтаў, але не шчыравала ў гэтым.
Былы палітвязень знайшоў у Вільні падпрацоўку ў чаце — і трапіў пад крыміналку за правакацыі супраць Украіны16
Каментары