«Не дазволім ніводнай кроплі нафты пакінуць рэгіён». Іран пагразіў «спальваць» усе судны ў Армузскім праліве
Тэгеран таксама гатовы «ударыць па ўсіх нафтаправодах у рэгіёне», каб спыніць экспарт нафты з Блізкага Усходу.
Іран будзе «спальваць» усе замежныя судны, якія паспрабуюць прайсці праз Армузскі праліў, заявіў дарадца камандуючага Корпусам вартавых ісламскай рэвалюцыі (КВІР) Ібрахім Джабары, піша Moscow Times.
«Мы не дазволім ніводнай кроплі нафты пакінуць гэты рэгіён», — падкрэсліў ён, дадаўшы, што Тэгеран гатовы «ўдарыць па ўсіх нафтаправодах у рэгіёне», каб спыніць экспарт нафты з Блізкага Усходу.
З 28 лютага, калі пачалася ваенная аперацыя ЗША і Ізраіля супраць Тэгерана, іранскія ваенныя атакавалі пяць нафтавых танкераў у Армузскім праліве.
У прыватнасці, пад удары трапілі танкеры MRD Vyom пад сцягам Маршалавых Астравоў, Hercules Star (Гібралтар), Stena Imperative (ЗША), Athen Nova (Гандурас), а таксама адно судна ў порце Джэбель-Алі (ААЭ).
Армузскі праліў — найважнейшая энергетычная артэрыя планеты: праз яе праходзіць каля 20% сусветных паставак нафты і да 30% звадкаванага прыроднага газу (ЗПГ).
Пасля пачатку ваеннай аперацыі супраць Ірана суднаходства ў пратоцы аказалася паралізавана — Тэгеран, які кантралюе паўночны бераг пратокі, аб'явіў аб спыненні гандлю праз яе.
Паводле даных сістэмы адсочвання суднаў MarineTraffic, па стане на вечар 2 сакавіка ў Армузскім праліве не было ніводнага танкера. Пры гэтым назіралася назапашванне суднаў ля ўваходу ў яе — ля ўзбярэжжа ААЭ і паміж Аманам і Іранам. У агульнай складанасці на рэйдзе або ў руху побач з воднай артэрыяй знаходзіліся больш за 250 суднаў, якія перавозілі нафту, нафтапрадукты і ЗПГ. Акрамя таго, на ўваходзе ў пратоку назіралася каля 70 балкавозаў і кантэйнеравозаў. Да перакрыцця маршруту Іранам праз яго праходзілі 200—300 суднаў у дзень, забяспечваючы пастаўкі энергарэсурсаў з краін Персідскага заліва ў Азію і Еўропу.
На фоне закрыцця Армузскага праліву кошт нафты маркі Brent у ходзе таргоў 2 сакавіка вырас на 13% і дасягнуў $82,37 за барэль — рэкорднага значэння з сярэдзіны студзеня 2025 года. Аднак затым скарэктаваўся да $78,1 (+8%). Адначасова з гэтым цана на газ у Еўропе падскочыла больш чым на 50% — да 48,85 еўра за МВт-г, або $591,5 за 1000 кубаметраў. У апошні раз газ каштаваў столькі ў пачатку лютага мінулага года.
Каментары