«Nie dazvolim nivodnaj kropli nafty pakinuć rehijon». Iran pahraziŭ «spalvać» usie sudny ŭ Armuzskim pralivie
Tehieran taksama hatovy «udaryć pa ŭsich naftapravodach u rehijonie», kab spynić ekspart nafty ź Blizkaha Uschodu.
Iran budzie «spalvać» usie zamiežnyja sudny, jakija pasprabujuć prajści praz Armuzski praliŭ, zajaviŭ daradca kamandujučaha Korpusam vartavych isłamskaj revalucyi (KVIR) Ibrachim Džabary, piša Moscow Times.
«My nie dazvolim nivodnaj kropli nafty pakinuć hety rehijon», — padkreśliŭ jon, dadaŭšy, što Tehieran hatovy «ŭdaryć pa ŭsich naftapravodach u rehijonie», kab spynić ekspart nafty ź Blizkaha Uschodu.
Z 28 lutaha, kali pačałasia vajennaja apieracyja ZŠA i Izraila suprać Tehierana, iranskija vajennyja atakavali piać naftavych tankieraŭ u Armuzskim pralivie.
U pryvatnaści, pad udary trapili tankiery MRD Vyom pad ściaham Maršałavych Astravoŭ, Hercules Star (Hibrałtar), Stena Imperative (ZŠA), Athen Nova (Handuras), a taksama adno sudna ŭ porcie Džebiel-Ali (AAE).
Armuzski praliŭ — najvažniejšaja enierhietyčnaja arteryja płaniety: praź jaje prachodzić kala 20% suśvietnych pastavak nafty i da 30% zvadkavanaha pryrodnaha hazu (ZPH).
Paśla pačatku vajennaj apieracyi suprać Irana sudnachodstva ŭ pratocy akazałasia paralizavana — Tehieran, jaki kantraluje paŭnočny bierah pratoki, abjaviŭ ab spynieńni handlu praź jaje.
Pavodle danych sistemy adsočvańnia sudnaŭ MarineTraffic, pa stanie na viečar 2 sakavika ŭ Armuzskim pralivie nie było nivodnaha tankiera. Pry hetym nazirałasia nazapašvańnie sudnaŭ la ŭvachodu ŭ jaje — la ŭźbiarežža AAE i pamiž Amanam i Iranam. U ahulnaj składanaści na rejdzie abo ŭ ruchu pobač z vodnaj arteryjaj znachodzilisia bolš za 250 sudnaŭ, jakija pieravozili naftu, naftapradukty i ZPH. Akramia taho, na ŭvachodzie ŭ pratoku nazirałasia kala 70 bałkavozaŭ i kantejnieravozaŭ. Da pierakryćcia maršrutu Iranam praź jaho prachodzili 200—300 sudnaŭ u dzień, zabiaśpiečvajučy pastaŭki enierharesursaŭ z krain Piersidskaha zaliva ŭ Aziju i Jeŭropu.
Na fonie zakryćcia Armuzskaha pralivu košt nafty marki Brent u chodzie tarhoŭ 2 sakavika vyras na 13% i dasiahnuŭ $82,37 za barel — rekordnaha značeńnia ź siaredziny studzienia 2025 hoda. Adnak zatym skarektavaŭsia da $78,1 (+8%). Adnačasova z hetym cana na haz u Jeŭropie padskočyła bolš čym na 50% — da 48,85 jeŭra za MVt-h, abo $591,5 za 1000 kubamietraŭ. U apošni raz haz kaštavaŭ stolki ŭ pačatku lutaha minułaha hoda.
Kamientary