Сербская авіякампанія Air Serbia зноў пачала выкарыстоўваць паветраную прастору Беларусі на рэйсах паміж Бялградам і Масквой. Паводле даных Flightradar24, новы маршрут пачаў выкарыстоўвацца з 3 сакавіка 2026 года, заўважыў тэлеграм-канал «От винта | Авиация Беларуси».
Самалёты на лініі Бялград — Масква — Бялград цяпер рэгулярна пралятаюць праз мінскі раён палётнай інфармацыі (FIR Minsk (UMMV), хоць раней кампанія амаль пяць гадоў аблятала Беларусь.
Гэты маршрут лічыцца найбольш кароткім і зручным для авіяперавозчыка. У параўнанні з аблётам праз Польшчу і краіны Балтыі ён дазваляе скараціць шлях прыкладна на 100—150 кіламетраў. Гэта дае эканомію каля 10 хвілін палётнага часу і зніжае выдаткі на паліва. Акрамя таго, пры палёце праз Беларусь самалёт праходзіць праз меншую колькасць зон палётнай інфармацыі, што таксама памяншае навігацыйныя зборы.
Раней Air Serbia адмовілася ад палётаў праз Беларусь у маі 2021 года пасля інцыдэнту з рэйсам Ryanair з Раманам Пратасевічам на борце, які быў вымушана пасаджаны ў Мінску. Пасля гэтага многія еўрапейскія авіякампаніі пачалі пазбягаць беларускай паветранай прасторы. Хоць Air Serbia не ўваходзіць у Еўрасаюз і не была абавязаная выконваць гэтыя рэкамендацыі, яна таксама змяніла свае маршруты.
Цяпер Air Serbia фактычна стала адзінай еўрапейскай авіякампаніяй (калі не лічыць расійскія і турэцкія), якая рэгулярна выкарыстоўвае паветраную прастору Беларусі. Акрамя таго, яна застаецца адной з нямногіх еўрапейскіх кампаній, што працягваюць выконваць рэйсы ў Расію.
Каментары