Журналісты знайшлі, дзе жыве адзін з начальнікаў калоніі Бабруйска — «кончаны садыст» Шынвізэ
Адзін з адыёзных начальнікаў калоніі Бабруйска Дзмітрый «Рудольф» Шынвізэ перабраўся ў Германію і стаў гер Dimitri Schönwiese. Цяпер нямецкія журналісты знайшлі яго дом.
Былы начальнік аператыўна-рэжымнай часткі бабруйскай калоніі №2 здолеў пачаць зусім новае, ціхае жыццё ў Германіі. Скарыстаўшыся сваімі нямецкімі каранямі, ён атрымаў статус «позняга перасяленца» і разам з жонкай пераехаў у Шверын — маляўнічую сталіцу зямлі Мекленбург — Пярэдняя Памеранія.
Некаторы час ягоны спакой нішто не парушала, пакуль «Наша Ніва» не распавяла пра яго, а цяпер і нямецкія журналісты выдання Welt am Sonntag выйшлі на ягоны след.
Цяпер лад ягонага ціхага жыцця крыху пахіснуўся.
Рэпарцёры пастукаліся ў ягоныя дзверы. І ім адкрыла жонка Шанвізэ.
Даведаўшыся, пра што ідзе гаворка, яна патэлефанавала мужу. Той забараніў ёй даваць свой нумар тэлефона. На пісьмовыя пытанні Welt am Sonntag ён не адказаў.
Як пісала «Наша Ніва», былыя зняволеныя бабруйскай калоніі гавораць пра выключна жорсткае абыходжанне з асуджанымі новага грамадзяніна Германіі і характарызуюць яго як «выключнага садыста».
Нямецкая крымінальная паліцыя (BKA) завяла справу для расследавання «абставін і магчымага ўдзелу дадзенай асобы ў патэнцыйных злачынствах супраць чалавечнасці». Да якіх вынікаў прыйшло расследаванне і ці працягваецца яно, пакуль не вядома.
Каментары