Велізарны збор на супердарагія лекі для Ксюшы з дзіцячага дома закрыты!
«Тое, што здавалася недасягальным, стала рэальнасцю».
«Слёзы на вачах, а ў сэрцы — бясконцая ўдзячнасць. Сёння мы прамаўляем самыя запаветныя словы: НАШ ЗБОР АФІЦЫЙНА ЗАКРЫТЫ!
Тое, што здавалася недасягальным, стала рэальнасцю дзякуючы ВАМ. Сума ў $1 827 307 сабрана цалкам і нават крыху больш! Гэта не проста лічбы ў справаздачы — гэта тысячы добрых сэрцаў, якія аб’ядналіся дзеля выратавання аднаго маленькага жыцця», — напісалі валанцёры.
Ксюшы Маісеенцы тры з паловай гады. У 2024 годзе Ксюшы паставілі дыягназ спінальная мышачная атрафія другога тыпу (СМА). Гэта рэдкая генетычная хвароба, пры якой паступова гінуць нейроны, што адказваюць за рух.
Мышцы становяцца ўсё слабейшымі. Дзіця страчвае сілу, спачатку ў руках і нагах, потым становіцца цяжка сядзець, трымаць галаву, глытаць ежу, дыхаць. І пасля — смерць.
У свеце ёсць лекі, якія могуць спыніць хваробу. Гэта генная тэрапія Zolgensma, бадай, самыя дарагія лекі ў свеце. Дзіця вылечваецца літаральна ад аднаго ўколу. Праблема ў тым, што іх кошт — каля $1,8 мільёна. А беларуская дзяржава пакуль не гатовая ўключыць выратаванне дзяцей з СМА ў праграму бясплатнай медыцыны.
Адметнасць сітуацыі Ксюшы ў тым, што яна жыве ў магілёўскім дзіцячым доме. Яе бацька памёр. А мама не справілася з цяжарам сітуацыі і здала дзяўчынку ў дзяржаўную ўстанову.
Дапамогі ад бацькоў чакаць не выпадала, але за Ксюшу сталі змагацца іншыя людзі. Вакол Ксюшы хутка з’явілася суполка валанцёраў. Яны стварылі чаты, групы і старонкі ў сацсетках, дзе каардынавалі дапамогу.
Гэта здавалася неверагодным, але гэта адбылося.
Адметна, што буйных плацяжоў ад дзяржавы ці бізнэсу не было, амаль уся сума — дробныя пераводы ад простых людзей.
Каментары