Кіраўніка івэнт-агенцтва «Тэра Груп» арыштавалі за «здраду дзяржаве» — Ярашэвіч нібыта шукаў інфармацыю пра наваполацкую калонію
У варшаўскай «Тэра Груп» працаваў да свайго таямнічага знікнення Анатоль Котаў.
Следчы камітэт паведаміў падрабязнасці крымінальнай справы двух палітвязняў — 42‑гадовага Андрэя Ярашэвіча і яго 36‑гадовага бізнэс-партнёра.
З сярэдзіны 2000‑х Ярашэвіч быў упраўляючым партнёрам івэнт-агенцтва «Тэра Груп».
Сілавікі выставілі бізнэсменам тры абвінавачванні — здрада дзяржаве (ч. 1 арт. 356), фінансаванне экстрэмісцкай дзейнасці (ч. 2. арт. 361-2) і крадзеж у асабліва буйным памеры (ч. 4. арт. 210). Мінімальна магчымае пакаранне — 7 гадоў калоніі. Максімальнае за здраду дзяржаве — 15 гадоў, але з улікам іншых артыкулаў можа быць яшчэ большым.
Як лічаць сілавікі, Ярашэвіч нібыта збіраў інфармацыю пра наваполацкую калонію №1 — персанальныя даныя супрацоўнікаў і ўмовы ўтрымання асуджаных. Па версіі СК, усё гэта рабілася для «Белпола».
Апроч таго, Ярашэвіч і яго бізнэс-партнёр нібыта выкарыстоўвалі сваю кампанію для фінансавання «экстрэмісцкіх фарміраванняў» Terra Group Event і SSL Production.
Сузаснавальнікам беларускай «Тэра Груп» з'яўляўся Віталь Крыўко. Ён працаваў у штабе Віктара Бабарыкі, пасля выбараў быў арыштаваны, пасля чаго атрымаў хатнюю хімію і ўрэшце эмігрыраваў.
Цяпер Крыўко жыве ў Польшчы, дзе адкрыў івэнт-агенцтва — таксама з назвай «Тэра Груп». У ім працаваў палітык Анатоль Котаў, які таямніча знік у Турцыі ў жніўні 2025 года.
Сілавікі палічылі, што беларускае івэнт-агенцтва перадавала свой прыбытак польскай юрыдычнай асобе — якую постфактум, у лістападзе 2025 года, абвесцілі экстрэмісцкім фармаваннем.
Нарэшце, трэцяе абвінавачванне заключаецца ў тым, што адзін з фігурантаў нібыта прысвоіў сабе больш за 240 тысяч рублёў, выплаціўшы сабе дывідэнды без згоды іншых уласнікаў. Няясна, гаворка ідзе пра Ярашэвіча ці яго бізнэс-партнёра.
Ярашэвіч быў арыштаваны ў сакавіку 2025 года. З таго часу знаходзіцца ў СІЗА. Яго бізнэс-партнёр таксама за кратамі.
Цяпер чытаюць
У Беларусі знайшлі копію швейцарскіх Альпаў — але турыстаў там не чакаюць2
Каментары