Былы кіраўнік Офіса прэзідэнта Украіны Андрэй Ярмак выйшаў з-пад варты пасля ўнясення залогу ў памеры 140 мільёнаў грыўняў (каля 3,2 млн даляраў). Ён пацвердзіў, што знаходзіўся ў платнай камеры павышанага камфорту.
Пасля выхаду з ізалятара Ярмак заявіў журналістам, што не ведае імёнаў тых, хто фінансава дапамог яму вярнуцца на волю, аднак дадаў, што грошы збіралі супольна «шмат чалавек», піша «Суспільне».
Экс-чыноўнік пацвердзіў, што падчас кароткага арышту знаходзіўся ў камеры павышанага камфорту, знаходжанне ў якой аплаціў яго адвакат.
Дадзены сэрвіс з'яўляецца часткай маштабнага праекта Міністэрства юстыцыі Украіны, запушчанага яшчэ ў 2020 годзе.
У Кіеўскім следчым ізалятары, дзе знаходзіўся Ярмак, кошт такіх VIP-паслуг з'яўляецца самым высокім у краіне: суткі пражывання тут каштуюць амаль 3 тысячы грыўняў (каля 70 даляраў), тыдзень — больш за 10 тысяч (каля 230 даляраў), а месяц — 15,5 тысяч грыўняў (350 даляраў).
Былы кіраўнік Мін'юста Дзяніс Малюска раней распавядаў, што ў сталіцы такія камеры карыстаюцца «вар'яцкай папулярнасцю», з-за чаго свабодных месцаў у іх практычна ніколі няма, а сам праект аказаўся вельмі паспяховым для фінансавання рамонту звычайных бясплатных камер.
Платныя камеры больш падобныя на нумары ў сціплых гатэлях. Там большая плошча на аднаго чалавека і меншая колькасць людзей (часта гэта 1— 2‑мясцовыя камеры). Там новы рамонт, ізаляваны санвузел, ёсць бытавая тэхніка — тэлевізар, халадзільнік, мікрахвалёўка, часам кандыцыянер і чайнік, больш якасныя ложкі і матрацы.
Андрэй Ярмак быў арыштаваны 14 мая. Паколькі да пятніцы ўсю суму сабраць не паспелі, выхадныя ён правёў у ізалятары.
Экс-кіраўнік офіса Зяленскага праходзіць у справе па адмыванні грошай праз будаўніцтва элітных дамоў пад Кіевам.
Ярмак кіраваў Офісам прэзідэнта Украіны з лютага 2020 па лістапад 2025 год. Яго называлі шэрым кардыналам украінскай палітыкі і фактычна віцэ-прэзідэнтам Украіны, хоць там няма такой пасады.
Цяпер чытаюць
Беларуская і расійская арміі на беларускай тэрыторыі трэніруюцца наносіць ядзерны ўдар10
Каментары
[Зрэдагавана]