Следчы камітэт расказаў падрабязнасці, як беларус атрымаў раненне на тэрыторыі Польшчы
Як паведаміў афіцыйны прадстаўнік Следчага камітэта Сяргей Кабаковіч, дзіўны выпадак з нібыта стралянінай польскімі паліцыянтамі па грамадзяніне Беларусі, адбыўся не недзе на памежжы, а на паўднёвым захадзе Польшчы.
Паводле версіі Следчага камітэта, уночы 12 мая 60‑гадовы мужчына, ураджэнец Слоніма, знаходзіўся на тэрыторыі Польшчы. Калі ён ехаў па аўтадарозе S8 каля горада Сыцаў, што ў Ніжнесілезскім ваяводстве на яго быў здзейснены, як сцвярджаецца, неабгрунтаваны напад з боку польскіх сілавікоў з выкарыстаннем агнястрэльнай зброі.
У выніку мужчына атрымаў цяжкія раненні галавы і канечнасцяў. Яго аўтамабіль таксама быў моцна пашкоджаны — у ім зафіксавалі 29 дзірак ад куль. Аднак жа, нягледзячы на гэтыя раненні, яму ўдалося перасячы мяжу, пасля чаго яго тэрмінова даставілі ў бальніцу.
Следчыя органы Беларусі цяпер праводзяць праверку. Паводле іх інфармацыі, ужо ўдалося аднавіць абставіны здарэння, вызначыць месца нападу і асобных паліцэйскіх, якія стралялі.
Дадатковыя падрабязнасці абяцаюць паведаміць пазней.
Каментары