За апошнія суткі ў Беларусь як мінімум тры разы заляцелі расійскія дроны
Інфармацыю пра чарговыя выпадкі залётаў расійскіх беспілотнікаў у Беларусь пры атацы па Украіне 25—26 мая сабраў «Флагшток» паводле даных украінскіх маніторынгавых каналаў.
Гэтым разам залёты фіксаваліся пераважна ў Брэсцкай вобласці. Тэлеграм-канал «Ринда моніторить» заявіў, што ў ноч на 26 мая былі адзначаныя неаднаразовыя залёты БПЛА ва Украіну з тэрыторыі Беларусі:
«Пакуль дакладна не вядома, з якой менавіта краіны быў здзейснены запуск беспілотніка, аднак можна сцвярджаць, што паветраную прастору Украіны ён перасек з боку Брэсцкай вобласці».
Каля 02:50 БПЛА прыляцеў з Беларусі курсам на Дубровіцу ў Ровенскай вобласці, а ў 03:20 адзін з расійскіх дронаў вылецеў з тэрыторыі Ровеншчыны ў кірунку Століна. Раніцай, у 07:10, адразу тры беспілотнікі рухаліся ўздоўж беларуска-ўкраінскай мяжы з Жытоміршчыны на Ровеншчыну, адзначыў канал «еРадар».
Паводле даных гэтага ж рэсурсу, у 23:30 25 мая недалёка ад горада Васілевічы ў Рэчыцкім раёне працаваў борт тактычнай авіяцыі, меркавана, СУ-30.
Да гэтага, днём у панядзелак, каля 10:00 адбыўся залёт БПЛА на Чарнігаўшчыну з Гомельшчыны — дрон накіроўваўся ў бок Славуціча.
Таким чынам, як мінімум тры выпадкі залётаў расійскіх беспілотнікаў у Беларусь зафіксаваныя за мінулыя суткі.
Каментары