«Аляксандр Лукашэнка не дасць у крыўду штучнаму інтэлекту нікога з тых, хто сядзіць у зале, і ў самой Беларусі. Лукашэнка выстаіць і гэтым разам, можна не сумнявацца. Ну што штучны інтэлект?.. І не такіх перажываў».
Асвятляючы працу Еўразійскага эканамічнага форуму ў Астане, спецыяльны карэспандэнт расійскага выдання «Коммерсантъ» Андрэй Калеснікаў шмат увагі надаў выступу Аляксандра Лукашэнкі пра штучны інтэлект. Яго цытаты журналіст суправадзіў шматлікімі іранічнымі заўвагамі.
Свой матэрыял Калеснікаў назваў «Отец и батька», змясціўшы фота Аляксандра Лукашэнкі і Касым-Жамарта Такаева. Чаму выбрана такая назва, чытачу становіцца зразумела ў самым канцы артыкула.
«Як Аляксандр Лукашэнка расказаў пра штучны інтэлект на ўроку інфарматыкі для калег», — так гучыць лід да артыкула, а сам ён пачынаецца з наступнай заўвагі: «Андрэй Калеснікаў лічыць, што хэдлайнерам дыскусіі стаў такі чалавек, як прэзідэнт Беларусі Аляксандр Лукашэнка, які, як кажуць, парваў усіх».
Калеснікаў заўважае, што з самага пачатку Лукашэнка імкнуўся імправізаваць:
«Не быў бы ён Аляксандрам Лукашэнкам, каб не мог на хаду перабудавацца і дадаць галоўнае ад сябе. Ды і давайце будзем адкрытымі: нават калі б ён не перабудаваўся, то ўсё роўна б дадаў».
Першае, што зрабіў Лукашэнка, — нагадаў, што па першай прафесіі ён настаўнік. І пасля заявіў, што «ў Беларусі сістэмная праца над гэтай тэмай [ШІ] вядзецца з сярэдзіны 1960‑х гадоў».
«Асабіста я з самага пачатку рыхтаваўся да таго, што Беларусь — радзіма штучнага інтэлекту, і цяпер мог толькі радавацца таму, што самыя смелыя здагадкі пацвярджаюцца», —
іранізуе журналіст і працягвае:
«Не разлічваючы, што слухачы задаваліся глыбіннымі пытаннямі, прэзідэнт Беларусі ўзяў не тое што быка за рогі, а казу, якой штучны інтэлект патрэбны як баян, і спытаў наўпрост:
— Што ж такое штучны інтэлект? Я хачу сказаць, што палова ў гэтай зале асабліва не пагружалася ў гэтае пытанне! І ў сілу нейкіх абставін, не ведаючы, што такое штучны інтэлект, я таксама належу да гэтых людзей!
Прызнанне каштавала шмат чаго.
— Але заўсёды ў Беларусі, — агаварыўся Аляксандр Лукашэнка, — я папярэджваю навамоднікаў, я магу свабодна пра гэта казаць, я не з’яўляюся рэтраградам! Першыя IT-паркі ў СНД з’явіліся ў Беларусі з маёй падачы!
Хто б сумняваўся!
Мяне, прызнацца, адольвала нават нейкая пяшчота да Аляксандра Лукашэнкі. Ён зноў не падвёў, прычым асабіста мяне як журналіста, якому заставалася толькі слухаць і намотваць, так бы мовіць, на магнітафонную стужку».
Не менш іранічна Калеснікаў адрэагаваў на развагі Лукашэнкі пра сутнасць ШІ. Калі палітык пачаў тлумачыць, што гэта ўсяго толькі «вобласць інфарматыкі», Калеснікаў заўважыў:
«Усё проста: лекцыя пра штучны інтэлект у вуснах школьнага настаўніка ператваралася, вядома ж, ва ўрок інфарматыкі».
Калі Лукашэнка заявіў, што чалавек і без ШІ мог бы вырашыць усе гэтыя задачы, проста на гэта спатрэбілася б больш часу, Калеснікаў саркастычна дадаў:
«Ну якая, насамрэч, лічбавая гонка, якая стаўка на які інтэлект?.. Гэта ўсё звычайная інфарматыка. Чаго ўсе вар'яцеюць?»
Асобна Калеснікаў цытуе Лукашэнку, дзе той заўважае:
«Час паскараецца, і гэты самы штучны інтэлект, гэты няшчасны камп’ютар, які ўжо дасягнуў велізарных вышынь, ён дапамагае чалавеку ў гэтым паскарэнні…»
Журналіст адзначыў:
«Штучны інтэлект — інфарматыка — камп’ютар… Звёны аднаго ланцуга былі пазначаныя. Зло названа па імені, а значыць, ужо страціла сваё д’ябальскае аблічча».
«Аляксандр Лукашэнка меў на ўвазе не сябе», — піша аўтар рэпартажу, цытуючы словы пра тое, што «штучнага інтэлекту асабліва баяцца людзі старэйшага пакалення».
Калеснікаў дзеліцца ўражаннямі:
«Аляксандр Лукашэнка выступаў часам як бацька родны, які, цалкам ясна, не дасць у крыўду штучнаму інтэлекту нікога з тых, хто сядзіць у зале, і ў самой Беларусі, вядома, таксама. Дык вось таму ён і «бацька» ім усім…»
Летапісец Пуціна Калеснікаў заўважае, што падчас выступу Лукашэнка некалькі разоў назваў прэзідэнта Казахстана Касыма-Жамарта Такаева «Касымам-аке». Журналіст піша, што «бачыў разгубленыя твары казахстанскіх журналістаў» і спытаў у аднаго з іх, што гэта слова значыць.
«Гадаем… — паціснуў ён плячыма. — Агаварыўся, напэўна, Аляксандр Рыгоравіч. Хоць не адзін раз сказаў… «Аке» — гэта «бацька»… А Касым — імя… Не сыходзіцца ўсё гэта…»
Аднак сам Калеснікаў прапанаваў сваё тлумачэнне:
«А па-мойму, усё сыходзілася. Бо там, дзе Аляксандр Лукашэнка — «бацька», там і Касым-Жамарт Такаеў — «отец».
Пры канцы выступу Лукашэнка запэўніў, што ШІ не заменіць чалавека, а будзе толькі дапамагаць яму, вызваляючы ад руціннай працы.
Паводле Калеснікава, пасля гэтага «яшчэ некаторы час Аляксандр Лукашэнка пераконваў прысутных, якія марылі ўхапіць штучны інтэлект за хвост (інакш усё…), што ганяцца за ім няма ніякага сэнсу. Ён для нас, а не мы для яго».
Праўда, іншыя выступоўцы ацэньвалі ШІ куды больш сур'ёзна.
«Гэта было занадта жорстка. Ды яшчэ і прэзідэнт Кыргызстана Садыр Жапараў згарача параўнаў штучны інтэлект з прамысловай рэвалюцыяй і палётам чалавека ў космас. Ды і Уладзімір Пуцін, можна сказаць, не да месца аддаў належнае штучнаму інтэлекту. (…) А потым калег падтрымаў яшчэ і віцэ-прэзідэнт Кубы, і віцэ-прэм'ер Арменіі, і віцэ-прэм'ер В'етнама…
Але Аляксандр Лукашэнка выстаіць і гэтым разам, можна не сумнявацца. Ну што штучны інтэлект?.. І не такіх перажываў».
Лукашэнка: Складанасць ШІ такая ж уяўная, як і кітайскай мовы
Аўтар расійскага «Коммерсанта» выбачыўся перад Лукашэнкам за тое, як апісаў ягоны прыезд на парад
«Гнілы вяртлявы під*рас. І *уясос». Азаронак назваў Калеснікава з пула Пуціна словамі, незвычайнымі нават для сваіх эфіраў
«Уважаемый Сарган Кемелевич». Пуцін зноў перакруціў імя прэзідэнта Казахстана
«Пра які саюз можна гаварыць?» Лукашэнка ў Астане раскрытыкаваў Расію за навязванне утыльзбораў15
Каментары