Двух амерыканцаў пераблыталі ў радзільні — яны даведаліся пра гэта выпадкова праз 36 гадоў
Кайл Байлін знайшоў сваю біялагічную сям'ю пасля таго, як зрабіў тэст ДНК, які выпадкова выцягнуў падчас каляднага абмену падарункамі.
Кайл Байлін і Джэрэмі Морысан пакінулі бальніцу ў ЗША з чужымі бацькамі ў 1988 годзе. Спатрэбілася 36 гадоў, каб выявіць гэтую памылку, апісвае Sky News.
Сем'і двух мужчын, якіх пераблыталі ў радзільні ў Паўночнай Дакоце 38 гадоў таму, абвінавацілі амерыканскую бальніцу ў тым, што яна пазбавіла іх таго жыцця, якім яны павінны былі жыць.
Кайл Байлін знайшоў сваю біялагічную сям'ю пасля таго, як зрабіў тэст ДНК, які выпадкова выцягнуў падчас каляднага абмену падарункамі.
Вынікі прывялі яго да біялагічнай цёткі на генеалагічнай платформе. Затым яе пляменнік, Джэрэмі Морысан, таксама здаў тэст ДНК.
Згодна з пазовам, пададзеным у суд штата на мінулым тыдні, Кайл Байлін і Джэрэмі Морысан былі адзінымі немаўлятамі, якія нарадзіліся 26 студзеня 1988 года ў медыцынскім цэнтры Unity у горадзе Графтан, Паўночная Дакота. Аднак яны пакінулі бальніцу з чужымі бацькамі.
Бальніца не адмаўляе, што дзяцей пераблыталі, але заяўляе, што не знайшла ніякіх доказаў таго, што менавіта яе персанал быў адказны за гэтую памылку, якая змяніла жыццё.
«Мы разумеем, які глыбокі ўплыў гэтае адкрыццё аказала на іх і іх сем'і», — гаворыцца ў заяве Unity Medical. — «На жаль, з-за таго, што прайшло амаль чатыры дзесяцігоддзі, медыцынскія дакументы і спісы персаналу, якія маглі б унесці дадатковую яснасць, больш не існуюць, і ніхто з тагачаснай брыгады прыёму родаў больш не працуе ў бальніцы».
Прайшло ўжо два гады з таго часу, як тэст ДНК выявіў падмену.
«Кайл па-ранейшаму мой сын — гэта ніколі не зменіцца, — сказала Эвелін Ньютан. — Але я адчуваю сябе абрабаванай: у мяне адабралі жыццё, якое я павінна была правесці са сваім біялагічным сынам. Нельга вярнуцца і замяніць 35 гадоў. Першыя крокі, кіраванне машынай, вяселле — як гэта кампенсаваць?»
Новае веданне Морысана пра сваё нараджэнне не змяніла яго пачуццяў да сям'і, якая яго выхавала.
«Мяне любілі, — сказаў ён. — Я займаўся спортам, добра вучыўся ў школе. Тэст ДНК не забярэ 38 гадоў успамінаў».
Аднак Морысан, які жыве ў Каларада і працуе інспектарам па зварцы ў кампаніі па ветраэнергетыцы, лічыць, што калі б не падмена, ён працаваў бы са сваім біялагічным бацькам і братам на іх зерневай ферме.
Эвелін Ньютан ніколі не мела прычын думаць, што Байлін не быў яе біялагічным сынам. Насупраць, Байлін абраў акадэмічную кар'еру далёка ад Паўночнай Дакоты і адчуваў сябе «іншым» у сям'і, якая яго выгадавала.
«На працягу жыцця, безумоўна, бывалі моманты, калі я адчуваў сябе паршывай авечкай у сям'і або нібы шукаў месца, якому належу, — сказаў ён. — І толькі праз гады высветлілася, што розніца сапраўды была… што ёсць прычына, чаму я не на ўсе 100% і не заўсёды ўпісваўся».
Цяпер мужчыны ўжо сустрэліся са сваімі біялагічнымі бацькамі, але яшчэ не бачыліся адзін з адным, хоць ужо размаўлялі па тэлефоне.
Цяпер чытаюць
Памерла Святлана Курс. У яе творах спалучаліся магія жывога жыцця і бязлітасны псіхалагізм. А ў публічных выступах і ФБ — рэзкі антыімперыялізм і элегантны лірызм1818
Каментары