Даверлівая мінчанка скінула арандатарам з Расіі копію свайго пашпарта. А тыя цішком прадалі яе кватэру коштам $90 тысяч

У сакавіку 2019 года да мінчанкі, якая здавала сваю кватэру ў Маскоўскім раёне за $450 на месяц, звярнуліся кліенты: «рыэлтар Аляксандр» і «Наталля з Ніжняга Ноўгарада».

Жанчына расказала кранальную гісторыю — маўляў, працуе ў расійскай фірме, што спецыялізуецца на медпрэпаратах, хоча перавезці ў Мінск 10‑гадовага сына, а арэнду будзе аплачваць кампанія. Праўда, для гэтага «працадаўцу» нібыта патрэбная копія пашпарта ўласніцы. Тая нічога не западозрыла і перадала копіі дакументаў на кватэру, свайго пашпарта і ключы. «Наталля» нават папрасіла не заключаць афіцыйны дагавор праз ЖЭС.

Кватэру арандатары амаль не выкарыстоўвалі — гаспадыня, прыходзячы па грошы, здзіўлялася ідэальнаму парадку. А ў гэты час парачка рыхтавала аферу: яны зрабілі падробленыя расійскія пашпарты з уклеенымі сваімі фота і фальшывую даверанасць, нібыта выдадзеную натарыусам у балгарскай Варне, паводле якой уласніца даручае «прадаць» сваю кватэру.

10 мая 2019 года махляры прыйшлі ў Мінскае гарадское агенцтва па дзяржрэгістрацыі і за 45 хвілін аформілі куплю-продаж: жанчына выступала ад імя ўласніцы па даверанасці, мужчына — як «пакупнік». Рэгістратара падробкі не насцярожылі: быў і апастыль, і натарыяльна завераны пераклад. Так кватэра коштам каля $90 тысяч афіцыйна перайшла да чалавека, якога не існуе, — пашпарт «пакупніка» таксама быў фальшыўкай.

Выкрылася ўсё выпадкова: махляры паспрабавалі кватэру перапрадаць, і патэнцыйная пакупніца, якой «гаспадар Анатоль» адмовіўся паказваць дакументы, звярнулася да вахцёркі дома. Старшыня таварыства ўласнікаў патэлефанавала сапраўднай гаспадыні. А канчаткова жанчына даведалася, што яе кватэра «прададзеная», у падатковай, куды прыйшла аформіць выплату падатку ад арэнды.

Беларускі суд прызнаў здзелку нікчэмнай і вярнуў ёй права ўласнасці.

Следства высветліла, што за «Наталляй» і «Аляксандрам» хаваліся расіяне Марына Марава і Канстанцін Башарын. Прычым для Маравай гэта была адпрацаваная схема: у тым жа 2019 годзе яна гэтак жа «ўвяла» кватэру ў расійскай Кастраме — зняла яе па падробленым беларускім пашпарце, перарэгістравала на сябе і паспела прадаць маладой сям'і. Пакупнікі даведаліся, што купілі чужую кватэру, калі сустрэлі ў ёй сапраўдных гаспадароў.

Беларуская пракуратура перадала справу расійскім калегам. 13 снежня 2024 года Ленінскі раённы суд Кастрамы прызнаў абаіх вінаватымі ў махлярстве ў асабліва буйным памеры. Марава атрымала з улікам ранейшага прысуду 5 гадоў 4 месяцы калоніі, Башарын — паўтара года. Праўда, з залічэннем ужо адседжанага тэрміну абаіх вызвалілі проста ў зале суда — пакаранне палічылі цалкам адбытым. Віну яны так і не прызналі.

• 1
• 1
• 11
• 28
• 2
• 1
• 10
• 1