У Ірландыі пяцёра падлеткаў загінулі, паехаўшы па сустрэчцы дзеля лайкаў у тыктоку. Паліцыя вырашыла не гнацца за імі
Па пратаколе бяспекі нельга даганяць па сустрэчцы, каб не нарабіць яшчэ большай бяды.
Раніцай у нядзелю, 16 жніўня 2026 года, на аўтастрадзе M9 у графстве Кілдэр (Ірландыя) загінулі пяцёра падлеткаў — усе яны знаходзіліся ў BMW, які на вялікай хуткасці ехаў насустрач руху і на поўным ходзе сутыкнуўся з сямейным аўтамабілем. Трагедыя стала апошняй у серыі здарэнняў, калі ірландская моладзь свядома выязджае насустрач руху на хуткасных трасах, каб зняць відэа для сацсетак, піша The Sun.
Паводле паліцыі, яшчэ каля другой гадзіны ночы з'явілася паведамленне, што група маладых людзей спрабуе ўзламаць дамы і аўтамабілі ў горадзе Аці (Athy). Калі патруль запатрабаваў ад кіроўцы чорнага BMW спыніцца, той уцёк. Пазней аўтамабіль, у якім знаходзіліся пяцёра падлеткаў у масках або балаклавах, двойчы выязджаў на паласу насустрач руху на M9: спачатку з'ехаў на заправачную станцыю і зноў вярнуўся на трасу, а потым зноў панёсся па чужой паласе. Паліцэйскія паспелі выставіць спецыяльныя шыпы каля з'езда з трасы, аднак кіроўца не спыніўся — і праз некалькі хвілін BMW сутыкнуўся лоб у лоб з Hyundai, які ехаў насустрач.
У выніку ўдару ўсе пяцёра падлеткаў у BMW загінулі на месцы. У Hyundai знаходзіліся чатыры чалавекі: двое, якія знаходзіліся спераду, шпіталізаваныя ў крытычным стане, пасажыры ззаду атрымалі сур'ёзныя траўмы. Сям'я накіроўвалася ў аэрапорт Дубліна, каб паляцець на вяселле сваякоў у Брытаніі.
Камісар паліцыі Ірландыі Джасцін Кэлі назваў здарэнне жахлівым і адзначыў, што асабліва абуральнае тое, што ў шэрагу выпадкаў маладыя людзі ідуць на такі рызыкоўны крок дзеля лайкаў у сацсетках.
Здарэнне на M9 — не выпадковае. У апошні час у Ірландыі дзейнічаюць банды падлеткаў, якія спаборнічаюць паміж сабой, спрабуючы зняць усё больш небяспечнае відэа для TikTok і іншых сацсетак.
Падлеткі свядома карыстаюцца тым, што паліцэйскія па пратаколе бяспекі не маюць права праследаваць аўтамабіль, які едзе насустрач руху на хуткаснай трасе, — гэта робіць такую тактыку прывабнай для ўцёкаў.
Прадстаўнікі паліцыі заклікаюць сацыяльныя сеткі актыўна выдаляць відэа з небяспечнай яздой, захоўваць доказы для следства і блакіраваць акаўнты тых, хто выкладае такі кантэнт, а таксама ўкараняць на дарогах тэхнічныя рашэнні — сістэмы выяўлення руху насустрач і прылады для прымусовага спускання шын у скрадзеных аўтамабіляў.
Каментары