Беларускі шоўмен Вадзім Галыгін адчувае сябе ў Расіі як рыба ў вадзе. Цяпер ён вядзе буйныя праекты на расійскім тэлебачанні, здымаецца ў серыяле з двухсэнсоўнай назвай і плануе ўшанаваць успаміны расійскіх акупантаў.
У пачатку жніўня ў Расіі пачалі здымаць новы серыял «Кладзём на сумленне!» для канала ТНТ. Гэта гісторыя пра маладзёнаў Сашу і Вадзіка, якія едуць у расійскую глухмень, каб праходзіць практыку па ўкладванні дарожнага палатна. Там яны трапляюць у суворы мужчынскі калектыў — выглядае, сюжэт якраз будзе пабудаваны на ўзаемадзеянні ўчарашніх студэнтаў і таго калектыву.
Адну з галоўных роляў аддалі беларусу Вадзіму Галыгіну. Кажуць, што тую ролю якраз пісалі пад яго. Вытворчасцю праекта займаецца расійская кампанія «Взор», дзе Галыгін з’яўляецца адным з саўладальнікам. Ён зарэгістраваў кампанію ў красавіку 2026‑га разам з былым расійскім комікам Аляксандрам Туркіным і з Уладзімірам Мікулічам, прадзюсарам родам з Беларусі.
А ў кастрычніку выходзіць мультфільм, у якім Галыгін даў свой голас аднаму з персанажаў — «Прыгоды маманцяняці. У пошуках мамы». Гэта перапрацоўка знакамітай савецкай казкі пра маманцяня, вось толькі выглядае, што па характары гэта будзе зусім іншая стужка.
Мяркуючы па трэйлеры, Галыгін агучвае так званага МС Тупіка — птушаня-рэпера. Калі маманцяня губляецца і застаецца без мамы, Тупік цягне яго на афрыканскі конкурс талентаў, дзе сам хоча выступіць. І паколькі гэта роля рэпера, Галыгін дзеля агучкі паспрабаваў чытаць рэп.
Шоўмен часта вядзе перадачы на расійскіх каналах, але прыязджае і ў Беларусь. Напрыклад, ён быў у Мінску ў сярэдзіне ліпеня 2026-га, калі туды прыехала Арына Сабаленка дзеля адкрыцця новых тэнісных кортаў. Галыгін наведаў тое адкрыццё і запосціў фоты з былым тэнісістам Максімам Мірным і былым футбалістам Дзмітрыем Багам.
Ёсць у яго і іншыя сувязі са спортам — Галыгін не першы год звязаны з камандай «Арт-Старс». Там разам гуляюць вядомыя беларусы і прафесійныя футбалісты, час якіх прайшоў.
Вадзім не забывае пра дабрачыннасць — праўда, у яго яна часткова накіраваная на расійскіх вайскоўцаў. Ён — віцэ-прэзідэнт міжнароднага таварыства «Рыбакі U Паляўнічыя». 19 мая 2026 года тое таварыства зладзіла канцэрт Аляксандра Разэнбаума, рэзідэнта гэтага таварыства і прыхільніка вайны ва Украіне, які знаходзіцца пад персанальнымі ўкраінскімі санкцыямі. На канцэрт прывезлі 1800 падлеткаў, у тым ліку сувораўцаў і дзяцей расійскіх вайскоўцаў, якія вядуць захопніцкую вайну ва Украіне.
А ў чэрвені 2026‑га беларус паведаміў, што рыхтуе праект пра расійскіх салдат. Галыгін хоча збіраць успаміны расійскіх вайскоўцаў па лістах, запісках і дзённіках — як ён патлумачыў журналістам, «душа так патрабуе». Таксама да выхаду рыхтуюць серыял «Адваротны бок медаля» пра расійскіх ваякаў — Галыгін там заяўлены як адзін з генеральных прадзюсараў.
Што да асабістага, некалькі месяцаў таму ў Вадзіма нарадзіўся трэці сын, малога назвалі Лукой. Пры гэтым у Галыгіна ёсць дарослая дачка Таісія, якая ў 2025‑м нарадзіла яму ўнука.
Вадзім рэдка спявае, але да 9 мая 2026 года ён выпусціў новы трэк пад назвай «Танька». У прыпеве ён ад асобы танкіста звяртаецца ў лісце да дзяўчыны і просіць яе дачакацца яго, а ліст той нібыта піша ў падпаленым танку і «на радкі капае браня». Песня, якую відавочна планавалі рабіць ваеннай, гучыць дзіўна.
«Наша Нiва» — бастыён беларушчыны
ПАДТРЫМАЦЬ
Каментары