ЗША запрасілі прэзідэнта Расіі Уладзіміра Пуціна на саміт «Вялікай дваццаткі» (G20), які пройдзе 14—15 снежня ў Маямі. Пра гэта паведаміў дзяржсакратар ЗША Марка Рубіа. Паводле яго слоў, саміт можа стаць магчымасцю для Пуціна пагутарыць не толькі з прэзідэнтам ЗША Дональдам Трампам, але і з іншымі сусветнымі лідарамі.
Пуцін не наведваў саміты G20 з 2019 года. Напярэдадні Трамп выказаў сумнеў, што расійскі прэзідэнт прыедзе ў Маямі, аднак дапусціў магчымасць яшчэ адной асабістай сустрэчы з ім. Рубіа паведаміў, што такая сустрэча пакуль не абмяркоўвалася.
Апошні раз Пуцін і Трамп сустракаліся на саміце ў Анкорыджы на Алясцы ў жніўні 2025 года. Галоўнай тэмай той сустрэчы было завяршэнне вайны ва Украіне.
Тым часам крыніцы агенцтва Bloomberg, блізкія да Крамля, сцвярджалі, што Пуцін, верагодна, прапусціць саміт G20 у ЗША. Паводле іх, замест гэтага ён плануе наведаць саміт Азіяцка-Ціхаакіянскага эканамічнага супрацоўніцтва (АЦЭС) у Кітаі, які пройдзе 18—19 лістапада пад старшынствам кіраўніка КНР Сі Цзіньпіна.
Bloomberg адзначаў, што Пуцін імкнецца пазбягаць шматбаковых міжнародных форумаў, дзе яму давялося б сустракацца з еўрапейскімі саюзнікамі Украіны, а таксама лідарамі Канады, Японіі, Паўднёвай Карэі і Аўстраліі. Акрамя таго, у Крамлі асцерагаюцца магчымай прысутнасці на саміце G20 прэзідэнта Украіны Уладзіміра Зяленскага. Раней Зяленскі прапаноўваў Пуціну правесці падчас саміту двухбаковую сустрэчу, прысвечаную завяршэнню вайны.
У пачатку восені памочнік прэзідэнта Расіі Юрый Ушакоў паведамляў, што Пуцін і Сі Дзіньпін абмяркоўвалі магчымасць трохбаковай сустрэчы з Трампам падчас саміту АЦЭС. Аднак яе правядзенне будзе залежаць ад таго, ці паедзе амерыканскі прэзідэнт у Кітай.
23 верасня прэс-сакратар Крамля Дзмітрый Пяскоў заявіў, што Пуцін гатовы да новай асабістай сустрэчы з Трампам. Пры гэтым ён прызнаў, што канкрэтных дамоўленасцяў наконт такой сустрэчы пакуль няма. Сам Трамп яшчэ ў пачатку верасня казаў, што гатовы зноў сустрэцца з Пуціным, але хацеў бы, каб гэта адбылося пасля дасягнення пагаднення па Украіне.
Каментары