У гэтых мінскіх кватэрах квадрат каштуе больш за 10 тысяч даляраў. Што за яны?
Гэта больш чым у чатыры разы даражэй, чым у сярэднім у сталіцы.
Палац у шматпавярховіку
Кватэра, квадрат у якой каштуе каля $10180, самая дарагая з выстаўленых на продаж у Мінску. Месціцца яна ў ЖК «Поры года» па адрасе Кісялёва, 17.
Просяць за яе $2,88 мільёна. Агульная плошча кватэры — 283 метры.
Як па плошчы, так і па інтэр'ерах яна больш падобная да палаца, а не да кватэры. Рамонт у гэтай кватэры выкананы ў класічным (палацавым) стылі з выяўнымі элементамі барока і ракако.
У кватэры тры санвузлы, адзін з якіх па памерах супастаўны са студыяй у «Мінск-Свеце», тры гардэробныя і нават пральня.
У асноўным спальным пакоі стаіць вялікі ложак. Столь і сцены упрыгожаныя ляпнінай, на падлозе ляжыць паркет.
Таксама ёсць вялізная сталовая-гасцёўня, дзве спачывальні, кабінет і кухня.
Аздабленне, уся мэбля і тэхніка ў кватэры выключна вытворчасці дарагіх брэндаў.
Сантэхніка і кухонны посуд у гэтай кватэры — італьянскай фірмы Versace.
Агулам кватэра пакідае ўражанне, быццам гэта нейкі палац XVIII—XIX стагоддзя, у якім жывуць арыстакраты.
Пры гэтым сам дом, у якім месцяцца гэтыя царскія апартаменты, звонку выглядае далёка не арыстакратычна.
З тэрасай і відам на Сляпянку
У кватэры, якую прадаюць у ЖК «Аквамарын», квадрат каштуе $10650. Агульная плошча — 216 метраў, з якіх амаль 93 прыпадае на тэрасу, з якой адкрываецца від на Сляпянку.
Самае вялікае памяшканне ўнутры кватэры — кухня-гасцёўня на 69 квадратаў. Рамонт у кватэры выкананы ў сучасным мінімалістычным стылі.
У кватэры два санвузлы, гардэробная на 21 квадрат і тры спачывальні. Адная для дарослых на 19 метраў і дзве дзіцячыя, якія маюць праход паміж сабой.
У апісанні пазначана, што над праектам кватэры працавалі французскія дызайнеры.
Разам з кватэрай ідуць два памяшканні на даху (творчыя студыі па 23 метры кожная) і два машына-месцы з прыладай сілкавання для электрааўтамабіляў.
За ўсё разам просяць $2,3 мільёна.
Апартаменты ў DEPO
Самы дарагі метр — у трохпакаёўцы ў квартале DEPO, 11 тысяч даляраў. Праўда, з улікам даволі невялікай плошчы кошт кватэры не такі ўжо высокі ў параўнанні з папярэднімі варыянтамі — усяго $980 тысяч.
Кватэра выканана ў мінімалістычным стылі з элементамі джапандзі (гэта спалучэнне японскага і скандынаўскага стыляў).
Самае вялікае памяшканне — кухня-гасцёўня амаль на 30 квадратаў.
Што да астатніх пакояў — спальні і кабінета, — то іх памеры сціплыя — 14,5 метра і 15 метраў.
Таксама ў кватэры ёсць два санвузлы і невялікая гардэробная з акном.
Наколькі рэальныя такія цэны на кватэры ў Мінску?
Пакуль самай дарагой кватэрай у Мінску, прададзенай за ўвесь час, лічацца апартаменты ў жыллёвым комплексе «Камфорт Парк» па адрасе Грыбаедава, 21. Кватэру на 168 метраў прадалі гэтым летам за $1,167 мільёна, то-бок амаль па $7000 за метр. І гэта за кватэру з голымі сценамі. Два парковачныя месцы каштавалі яшчэ амаль $100 тысяч.
Цяпер чытаюць
Бізнэсовец родам з Бабруйска адмовіцца ад свайго гіганцкага аўстралійскага заробку дзеля шанцу атрымаць $35 мільёнаў3
Каментары
ну вы канечне выказаліся) досыць "па-багатаму" і знешняе аздабленне дома таго..
дарэчы, а гэта не з-за гэтага (у тым ліку) дома сталінскі праспект (т.зв. Незалежнасці) не сталі ўключаць у спіс Юнэска? нагадайце мне.. а-то памяць зусім ужо ў кафку