Hary Pahaniajłu – 70! Piać faktaŭ pra viadomaha pravaabaroncu
Jon abaraniaŭ Čyhira i Šaramieta z Zavadskim, a taksama sudziŭsia z Łukašenkam.
14 kastryčnika 2013 hoda śviatkuje svajo 70-hodździe Hary Pahaniajła – adzin z samych znakamitych biełaruskich jurystaŭ.
«Naša Niva» ŭzhadvaje piać cikavych faktaŭ pra viadomaha pravaabaroncu.
Narodžany ŭ turmie
Hary Piatrovič naradziŭsia ŭ 1943 hodzie ŭ ekzatyčnym dla biełarusaŭ miescy. «Stancyja Plisieckaja Archanhielskaj vobłaści», – zapisana ŭ jaho paśviedčańni ab naradžeńnia. Heta była turma dla represavanych.
Maci Hary, polka Lidzija Pahaniajła, była ŭ šlubie trojčy. Proźvišča jana atrymała ad druhoha muža. Ivan Pahaniajła dasłužyŭsia da bujnoha vojenačalnika, adnak u 1937 hodzie, paśla aryštu jahonaha niepasrednaha načalnika Ijeranima Ubareviča, byŭ abvinavačany ŭ špijanažy i zdradzie dziaržavie. Žonka pajechała ŭ Maskvu da siabra siamji Klimienta Varašyłava pa dapamohu, adnak apynułasia ŭ turmie sama.
Rasstrelny prysud tolki ŭ apošni momant zamianili na piatnaccacihadovy termin.
Lidzija Pahaniajła adbyvała jaho na poŭnačy Archanhielskaj vobłaści. Tam ad treciaha muža i naradziŭsia Hary. Svajo imia jon atrymaŭ u honar niejkaha amierykanskaha skrypača.
Pieršyja try hady žyćcia chłopčyk pravioŭ na terytoryi łahiera, a paśla da zakančeńnia škoły byŭ to ŭ adnym, to ŭ druhim dziciačym domie.
Hreka-rymski barec
Maci Hary adsiedzieła ŭ łahierach roŭna 15 hadoŭ. Paśla reabilitacyi ŭ 1957 hodzie jana atrymała ŭ jakaści kampiensacyi kvateru ŭ Minsku. Praź niekalki hadoŭ, skončyŭšy škołu, da jaje pierajechaŭ Hary. U stalicy Biełarusi jon uładkavaŭsia na zavod, paśla na try hady trapiŭ u armiju, a viarnuŭšysia, pastupiŭ na jurfak BDU.
Junactva ŭ dziciačym domie zahartavała Hary. Vyhladać słabym tam było nielha. Dziciačyja bojki da pieršaj kryvi, maržavańnie padčas słužby ŭ armii, zaniatki sportam - usio heta dazvalaje 70-hadovamu jurystu dahetul trymacca ŭ formie.
U škole jon zachaplaŭsia boksam, paśla baraćboj. Hary byŭ členam biełaruskaj moładzievaj zbornaj pa hreka-rymskaj baraćbie i čempijonam BDU.
Śpiecyjalist pa hučnych spravach
Advakat na Kaściukoviččynie, sudździa na Bychaŭščynie, śledčy vajennaj prakuratury, načalnik adździeła advakatury ministerstva justycyi BSSR, kiraŭnik jurydyčnaj kansultacyi Savieckaha rajona Minska, prezident Sajuza jurystaŭ Biełarusi… – karotki pierakaz «tvorčaha šlachu» Hary Pahaniajła da advakactva
Za bolš za 40 hadoŭ pracy jon zajmieŭ status samaha viadomaha advakata Biełarusi. Pahaniajłu davodziłasia dapamahać Słavamiru Adamoviču, Tamary Vińnikavaj, Paŭłu Šaramietu i Źmitru Zavadskamu, Michaiłu Čyhiru, Vasilu Staravojtavu, Andreju Klimavu… Advakat zarabiŭ sabie imia jak bieskapramisny zmahar za pravy svaich padabaronnych. Kali ŭ sudzie Pahaniajła - to jon budzie bicca da apošniaha.
Byli i inšyja klijenty – naprykład, na pačatku 1990-ych Pahaniajła byŭ advakatam ministra abarony Paŭła Kazłoŭskaha, jaki padaŭ pazoŭ suprać haziety «Źviazda», jaje žurnalista Mikoły Dziabioły i kandydata ŭ prezidenty Alaksandra Łukašenki, intervju ź jakim była apublikavana ŭ vydańni. Praŭda, paśla taho, jak Łukašenka pieramoh na vybarach, Kazłoŭski adklikaŭ pazoŭ.
A na palityčnych internet-forumach čaściakom nahadvajuć, što da Pahaniajły ŭ 1990-yja źviartalisia pa dapamohu «złodziei ŭ zakonie». Što ž, prava na abaronu ŭ sudzie jość u kožnaha hramadzianina.
Vyjazny paśla zabarony
Adnosiny z łukašenkaŭskim režymam u Pahaniajły nie skłalisia. U 1998 hodzie, praz paŭhodu paśla vyniasieńnia davoli libieralnaha prysudu Šaramietu i Zavadskamu (umoŭny termin i vyzvaleńnie ŭ zali suda), u jaho zabrali biełaruskuju advakackuju licenziju.
U tym ža hodzie Pahaniajła staŭ namieśnikam staršyni Biełaruskaha Chielsinkskaha kamiteta – adnoj z dvuch najbujniejšych pravaabarončych arhanizacyj krainy. U hetaj arhanizacyi juryst zastajecca dahetul, niejki čas spałučaŭšy pracu ŭ BCHK z praktykaj u Maskvie.
U 2012 hodzie Pahaniajła trapiŭ u śpis nievyjaznych ź Biełarusi.
Jamu zajavili, što heta nibyta adbyłosia na padstavie… spravy ab bankructvie. Praz try miesiacy pravaabaronca damohsia aficyjnych prabačeńniaŭ ad načalnika Departamienta hramadzianstva i mihracyi MUS Alaksieja Biehuna i atrymaŭ daviedku pra toje, što vyklučany z bazy nievyjaznych.
Uzorny siemjanin
Hary Pahaniajła razam z žonkaj padbirajucca da załatoha viasiella. U ich dvoje dziaciej i čaćviora ŭnučak.
Dačka Alena pajšła pa śladach baćki, stała jurystam. Siamiejnym padradam jana navat vydali jurydyčny dapamožnik. A voś syn staŭ technarom.
* * *
«Naša Niva» vinšuje Hary Piatroviča ź jubilejem!
Ciapier čytajuć
Maskvička raspaviała, jak razam z žanichom ledź nie zahinuła ŭ avaryi pa darozie na svajo viasielle ŭ siadzibie pad Łahojskam2
Maskvička raspaviała, jak razam z žanichom ledź nie zahinuła ŭ avaryi pa darozie na svajo viasielle ŭ siadzibie pad Łahojskam
«Ludzi kamientavali, što salmanieła ŭvajšła ŭ čat». Biełarus pajechaŭ pracavać u Kremnijevuju dalinu — i staŭ kulinarnym błohieram na 28 miljardaŭ prahladaŭ55
Kamientary