Čamu Rasija vypuściła Janukoviča na scenu mienavita siońnia

Čamu Rasija vypuściła Janukoviča na scenu mienavita siońnia? Zajava jaho była pustoj i karotkaj, apuchły tvar śviedčyŭ pra mahčymyja prablemy z sercam. Čamu ž jon źjaviŭsia na publicy 11 sakavika?

Nahadajem, što pieršaja pres-kanfierencyja Janukoviča adbyłasia 28 lutaha, a na nastupny dzień Rada Fiederacyi Rasii pryniała šokavaje rašeńnie ab dazvole na ŭvod vojskaŭ va Ukrainu.

Orhany ŭłady va Ukrainie patrochu kansalidujucca. Im udałosia zatrymać niekalki dziasiatkaŭ šturmavikoŭ i dyviersantaŭ u Danbasie. Jašče niekalki dzion — i «pratesty» tam pojduć na spad.

Siońnia Viarchoŭnaja Rada Ukrainy maje abmierkavać zakon ab stvareńni Nacyjanalnaj hvardyi.

Hetaja siłavaja struktura maje paŭstać na dobraachvotnaj asnovie, heta značyć, što jaje bazu składuć siły Samaabarony Majdanu. Nacyjanalnaja hvardyja, takim čynam, stanie pieršaj bajazdolnaj u rasparadžeńni ŭkrainskaha ŭrada. Zbroi dla jaje Ukraina maje dosyć. Paśla jaje stvareńnia Ukraina pierastaje być biezabaronnaj i budzie zdolnaja akazać peŭny supraciŭ.

Rasii patrebnaja ekanamična słabaja, palityčna padzielenaja i vajskova biezabaronnaja Ukraina. Mienavita tamu Rasija moža zreahavać na stvareńnie Hvardyi novym previentyŭnym udaram.

«Ja nie tolki lehitymny prezident, ale i hałoŭnakamandujučy», — nahadaŭ Janukovič.

Mahčyma, źjaŭleńnie Janukoviča nie było vypadkovym. Nie vyklučana, siońnia-zaŭtra Ukrainu moža čakać novy vitok napružańnia.

Taktyka Rasii ŭ dačynieńni da Ukrainy hetyja dni nahadvaje jaje dziejańni ŭ Rečy Paspalitaj u XVIII st. Tady Rasija vykarystoŭvała dla ŭmiašańnia va ŭnutranyja spravy nahodu «abarony pravasłaŭnych», va Ukrainie – «ruskamoŭnaha nasielnictva». Tady Rasija paśladoŭna spyniała lubyja sproby kiraŭnikoŭ RP stvaryć bajazdolnaje vojska, azdaravić palityčnuju sistemu i ekanomiku.

Pad samymi roznymi padstavami: navat «abarony spradviečnych pravoŭ šlachty». Narešcie, skarystaŭšy mižnarodnaje stanovišča, jana pačała adhryzać pa kavału ad terytoryi.

Pucin razumieje, što jak tolki Ukraina vierniecca da ekanamičnaha rostu, niezadavalnieńnie na ŭschodzie Ukrainy raspalić budzie ciažej.

Tak, jak uschod nie patrabavaŭ dałučeńnia da Rasii pry «aranžavaj uładzie», jakaja – ciapier na heta hladziš inakš – daviała zołatavalutnyja reziervy krainy da 37 miljardaŭ dalaraŭ.

Były daradca Pucina Andrej Iłaryjonaŭ miarkuje, što zadača-maksimum Kramla — dałučyć da Rasii abo prynamsi zaniać Adesu i Danbas. Tak možna budzie harantavać voda- i enierhazabieśpiačeńnie Kryma i adrezać Ukrainu ad mora i naftahazavaha šelfa. Iłaryjonaŭ miarkuje, što dziela dasiahnieńnia hetaj mety Pucin hatovy pajści va-bank.

Tryvožna prahučała i zajava prezidenta Litvy Dali Hrybaŭskajcie.

Učora na Litoŭskim telebačańni jana zajaviła, što Rasija navat nie dumaje ab adstupleńni i zachavańni ŭłasnaj hodnaści.

Pa słovach Hrybaŭskajcie, na samicie ŭ Bruseli na minułym tydni stała jasna, što niekatoryja jeŭrapiejskija lidary da kanca nie ŭśviedamlajuć situacyju, u jakoj apynulisia Rasija i Jeŭropa.

«Sioj-toj kazaŭ, što nielha zaraz akazvać na Rasiju zanadta vialiki cisk — kab dać joj mahčymaść zachavać svoj tvar i pakinuć joj «stratehiju adstupleńnia». Ja jasna skazała: Jeŭropie treba zachavać svoj tvar, a nie Rasii, jakaja nie źbirajecca hetaha rabić. Jeŭropa jašče da kanca nie razumieje, što adbyvajecca, i da kanca nie razumieje, što nastaŭ čas samoj Jeŭropie vyznačycca i zachavać svoj tvar», — skazała prezident Litvy.

Apytanka

• 0
• 0
• 0
• 0
• 0
• 0
• 0
• 0