Za košt čaho zdabyča paliŭna-enierhietyčnych vykapniaŭ u Biełarusi vyrasła na 28%?
Zahadka aficyjnaj statystyki.
Zhodna sa źviestkami Biełstata, zdabyča paliŭna-enierhietyčnych karysnych vykapniaŭ u krainie za dva pieršyja miesiacy hoda vyrasła adrazu na 27,8%. Heta dziŭna. Radoviščy biełaruskaj nafty vyčerpvajucca. A zdabyča torfu ŭ krainie ŭžo doŭhi čas zastavałasia na niaźmiennym uzroŭni, dyj jana małaznačnaja.
Što ž novaha «vykapali ŭ Biełarusi»? Paśla historyi z reekspartam nafty pad vyhladam rastvaralnikaŭ analityki staranna pryhladajucca da aficyjnych statźviestak.
U cełym ža za pieršy kvartał 2014 hoda pramysłovaja vytvorčaść źniziłasia na 3,4% da anałahičnaha pieryjadu 2013 hoda i skłała 162 trłn biełaruskich rubloŭ. Ale heta vynik rezkaha spadu ŭ studzieni-lutym. U sakaviku zafiksavany rost pramysłovaj vytvorčaści na 0,7% u hadavym vyličeńni i na 11,4% — u miesiačnym.
Ale kali adniać rost zdabyčy karysnych vykapniaŭ — rostu nie budzie.
Va ŭsich hałoŭnych siektarach biełaruskaj pramysłovaści padzieńnie praciahvałasia.
Najbolšy spad za pieršyja try miesiacy adbyŭsia ŭ vytvorčaści transpartnych srodkaŭ — na 25%, mašyn i abstalavańnia — na 17%, vytvorčaści humovych i płastmasavych vyrabaŭ — na 14%.
Zdabyča karysnych vykapniaŭ, akramia paliŭna-enierhietyčnych, źniziłasia na 9%, vytvorčaść skury i abutku — na 6%, vytvorčaść praduktaŭ — na 5%, vytvorčaść elektraabstalavańnia, elektronnaha i aptyčnaha abstalavańnia — amal na 5%, tekstylnaja i šviejnaja vytvorčaść — na 4%, vytvorčaść i raźmierkavańnie elektraenierhii, hazu i vady — na 3% (apošniaja źviazana ź ciopłaj zimoj), mietałurhija ŭpała na 2%, celułozna-papiarovaja vytvorčaść — na 1%.
Rost zafiksavany ŭ vytvorčaści naftapraduktaŭ — na 4%, dziakujučy rostu pastavak rasijskaj nafty. Vyrasła i chimičnaja vytvorčaść i drevaapracoŭka — na 5%, vynik madernizacyi raniej adstałaj haliny.
Kamientary