За кошт чаго здабыча паліўна-энергетычных выкапняў у Беларусі вырасла на 28%?
Загадка афіцыйнай статыстыкі.
Згодна са звесткамі Белстата, здабыча паліўна-энергетычных карысных выкапняў у краіне за два першыя месяцы года вырасла адразу на 27,8%. Гэта дзіўна. Радовішчы беларускай нафты вычэрпваюцца. А здабыча торфу ў краіне ўжо доўгі час заставалася на нязменным узроўні, дый яна малазначная.
Што ж новага «выкапалі ў Беларусі»? Пасля гісторыі з рээкспартам нафты пад выглядам растваральнікаў аналітыкі старанна прыглядаюцца да афіцыйных статзвестак.
У цэлым жа за першы квартал 2014 года прамысловая вытворчасць знізілася на 3,4% да аналагічнага перыяду 2013 года і склала 162 трлн беларускіх рублёў. Але гэта вынік рэзкага спаду ў студзені-лютым. У сакавіку зафіксаваны рост прамысловай вытворчасці на 0,7% у гадавым вылічэнні і на 11,4% — у месячным.
Але калі адняць рост здабычы карысных выкапняў — росту не будзе.
Ва ўсіх галоўных сектарах беларускай прамысловасці падзенне працягвалася.
Найбольшы спад за першыя тры месяцы адбыўся ў вытворчасці транспартных сродкаў — на 25%, машын і абсталявання — на 17%, вытворчасці гумовых і пластмасавых вырабаў — на 14%.
Здабыча карысных выкапняў, акрамя паліўна-энергетычных, знізілася на 9%, вытворчасць скуры і абутку — на 6%, вытворчасць прадуктаў — на 5%, вытворчасць электраабсталявання, электроннага і аптычнага абсталявання — амаль на 5%, тэкстыльная і швейная вытворчасць — на 4%, вытворчасць і размеркаванне электраэнергіі, газу і вады — на 3% (апошняя звязана з цёплай зімой), металургія ўпала на 2%, цэлюлозна-папяровая вытворчасць — на 1%.
Рост зафіксаваны ў вытворчасці нафтапрадуктаў — на 4%, дзякуючы росту паставак расійскай нафты. Вырасла і хімічная вытворчасць і дрэваапрацоўка — на 5%, вынік мадэрнізацыі раней адсталай галіны.
Каментары