Na litoŭskim «Hałapahai» «Krambambula» prezientavała novyja pieśni
A što heta za kraina?» — pamiatyja, z hołymi piŭnymi torsami, dabradušnyja litoŭskija panki tykajuć palcam na bieł-čyrvona-bieły ściažok na namiocie. «Biełaruś? Dy tut adnyja biełarusy! My z vami!»
Sapraŭdy, na žyvapisnym vostravie siarod voziera ŭ litoŭskim miastečku Zarasaj, u vychodnyja ščodra ŭsiejanym namiotami i scenami, biełaruskich ściahoŭ było niamała.
Galapagai, štohadovy muzyčny fiestyval na «litoŭskich brasłavach», hučaŭ sioleta i pa-biełarusku.
Na lasnoj scenie, što jak bliźniec padobnaja da boryku Basovišča, litoŭska-estonska-łatyšska-biełaruskuju moładź viesialiŭ žartami i fizičnymi praktykavańniami Vital Artyst z «Bieź bileta». A bližej da viečaru hałoŭnaja scena festu vybuchnuła «Krambambulaj». Set hučaŭ nastolki mocna, što padpiavać pačali i litoŭcy, a samyja zaciatyja naładzili realny słem. Biełarusy ž i ŭkraincy, što družnym choram śpiavali ŭsie krambambulnyja chity, krychu zmahli pieradychnuć chiba tolki na niekalkich novych pieśniach: uźniosłaja «Serca paŭstanca», nadzionnaja «Dla čužych my ŭsie varjaty» i bajavaja «Hej lićviny, Boh nam radzić!».
Nievialiki vostraŭ na voziery, što na sutyku Litvy, Łatvii i Biełarusi, na niekalki dzion pieratvarajecca ŭ sapraŭdnyja Hałapahosy, ź jarkaj fłoraj i faŭnaj:
panki, fryki, prostyja ludzi, hopniki, chipstary, siemji z malečaj, bajkiery, ravarysty, navat amatary 3D-druku. Tut nievierahodna spałučajucca pop-vystupy na adnoj scenie z alejaj zabavaŭ jak na zvyčajnym śviacie horadu, i maładyja indy-vykanaŭcy na inšaj scenie, dzie publika kaardynalna roźnicca. Niekalki plažaŭ, bieźlič hulniaŭ, akcyi, konkursy… Z roznych scenaŭ hučać AC/DC, Nirvana, Ełvis Preśli, Coj — sioleta kavier-hurty tut asabliva ŭ favory.
«Papai! Papai!» — ranica apošniaha dnia fiestyvalu pravodziła namiotavy haradok užo znajomymi hałasami viasiołych asipłych pankaŭ. «Papai!..» — padchoplivali stomlenyja sonnyja hałasy z roznych namiotaŭ. Hałapahai, papai… Pa viartańni pahuhlili pierakład raźvitalnych kličaŭ:)
Vydatny raźniavoleny fiestyval, jaki dla kožnaj kampanii svoj, absalutna raznastajny, čym i intryhoŭny, adnak adnolkava čakany. Fotamomanty z Galapagai viersii 2014 — u repartažy Generation.by.
Kamientary