Zakanadaŭstva ab pažarnaj biaśpiecy nie zabaraniaje raspalvać manhał u dvarach žyłych damoŭ.
«Razvodzić vohniščy i smažyć šašłyki na manhale lepš za ŭsio ŭ śpiecyjalna adviedzienych dla hetaha miescach u parkach i inšych zonach adpačynku. U toj ža čas zakanadaŭstva ab pažarnaj biaśpiecy nie zabaraniaje raspalvać manhał u dvarach žyłych damoŭ. Ale rabić heta treba, vykonvajučy peŭnyja praviły biaśpieki i miery zaściarohi», — raskazała Minsk-navinam aficyjnaja pradstaŭnica Minskaha haradskoha ŭpraŭleńnia MNS Volha Mielčanka.
Rekamiendujecca mieć pry sabie viadro z vadoj abo vohnietušyciel, kab u vypadku ŭzharańnia nieadkładna patušyć ahoń. Nie dapuskajecca vykarystańnie lohkaŭzharalnych i haručych vadkaściaŭ dla raspalvańnia vuhalu ŭ manhale (za vyklučeńniem vadkaściaŭ, śpiecyjalna pryznačanych dla hetaha).
Što datyčycca pryhatavańnia šašłykoŭ na bałkonie, heta kateharyčna zabaroniena.
«Hałoŭnaje — sačyć za iskrami, bo kali ŭźnimiecca viecier, jany mohuć stać pryčynaj pažaru. Kali z-za vašaha vohnišča budzie naniesiena jakaja-niebudź škoda (zaharycca łaŭka abo aŭtamabil susieda), adkazvać daviadziecca pavodle ŭsioj strohaści zakona», — skazała Volha Mielčanka.
Naprykład, na terytoryi, jakaja znachodzicca ŭ haspadarčym viadzieńni Minskaja haradskaja lesaparkavaja haspadarka ŭ stalicy i Minskim rajonie, abstalavana 187 miescaŭ dla pryhatavańnia šašłykoŭ.
Usie jany raźmieščany na bierahach vadaschoviščaŭ:
- Minskaje mora: plažy № 1, 2, 3, 4, 5, 6, 9;
- vadaschovišča Drazdy: plažy № 5, 6, 7;
- vadaschovišča Krynica: plažy № 3, 4;
- Cnianskaje vadaschovišča: plažy № 1, 2, 3, 5.
Zhodna z artykułam 16.41 Kodeksa ab administracyjnych pravaparušeńniach, štraf za raźviadzieńnie vohniščaŭ u zabaronienych miescach składaje da 12 bazavych vieličyń (540 rubloŭ).
Ciapier čytajuć
Rasijskaja błohierka-miljońnica, jakaja zhańbiłasia ź biełaruskaj movaj, zapisała videa z tłumačeńniami — ale tak i nie vybačyłasia30
Kamientary