List Miniusta nie jość piśmovym papiaredžańniem i tyčycca partnioraŭ Tut.by.
«Miniust źviarnuŭ uvahu «Tut baj miedyja» na parušeńnie zakanadaŭstva», — napisała «Sovietskaja Biełoruśsija» 19 maja. Takaja farmuloŭka była ŭspryniataja niekatorymi jak papiaredžańnie partału Tut.by.
Na samoj spravie «Tutbaju» ŭ hetym vypadku ničoha nie pahražaje, rastłumačyła «Našaj Nivie» juryst Ludmiła Čekina.
Ministerstva justycyi nakiravała list partnioram Tut.by, TAA «Blinhbaj», što arenduje ŭ «TUT BAJ MIEDYJA» damien treciaha ŭzroŭniu (realty.tut.by/bezagentov), kopiju lista atrymali i na Tut.by.
Kampanija «Blinhbaj» pradstaŭlała na realt.tut.by servis pryvatnych abviestak pa zdačy kvater u arendu, anałahičny servisu na sajcie bling.by.
«U liście havaryłasia, što dziejnaść pa pradstaŭleńni infarmacyjnych pasłuh, što tyčacca arendy nieruchomaści, moža ličycca ryełtarskimi pasłuhami, — raspaviadaje juryst. — Aznačeńnie ryełtarskaj dziejnaści ŭ nas vielmi šyrokaje, jano ŭklučaje zbor i pradstaŭleńnie infarmacyi pra popycie i prapanovie na rynku nieruchomaści. Z takoj traktoŭkaj ni my, ni našyja partniory, nie zhodnyja całkam. Budziem pravodzić dadatkovyja kansultacyi, rabić zapyt u toj ža Miniust».
Na siońnia «Blinhbaj» prypyniŭ akazańnie «sprečnych» płatnych pasłuh. Supraca z «Blinhbaj» — partniorski prajekt «TUT BAJ MIEDYJA», ale «Blinhbaj» — asobnaja arhanizacyja. Zakryćcio, zabarona ci štraf nie pahražajuć «Tutbaju».
«List składzieny ŭ takoj… skažam tak, dapuščalnaj formie, — tłumačyć Čekina. — Nie zusim zrazumieła, što ŭ sajcie pryvatnych abviestak, infarmacyju na jaki dadajuć sami karystalniki i jany ža niepasredna zaklučajuć pahadnieńnie z patencyjnym arandataram, moža razhladacca jak pasrednickaja dziejnaść. Resursaŭ, pryśviečanych nieruchomaści, u siecivie davoli šmat, u tym liku tych, što akazvajuć płatnyja pasłuhi. I nichto ź ich, nakolki nam viadoma, takich papiaredžańniaŭ pakul nie atrymlivaŭ».
***
Praktyčna adnačasova z navinoj pra list da «TUT BAJ MIEDYJA» źjavilisia naviny pra atrymańnie šeraham internet-sajtaŭ listoŭ ź Mininfarma. Siarod atrymalnikaŭ sajt Abjadnanaj hramadzianskaj partyi, muzyčny partał Tuzin.fm, kulturny časopis Kyky.org. Listy pryjšli navat u zamiežnyja ŚMI — u pryvatnaści, «Radyjo Racyja», što robiać biełarusy Biełastoččyny.
U listach havaryłasia ab vyjaŭleńni na sajtach parušeńniaŭ zakanadaŭstva pra ŚMI. Z tekstu listoŭ mahło zdacca, što sajtam jak ŚMI vyniesienaje piśmovaje papiaredžańnie (a paśla dvuch papiaredžańniaŭ za hod ŚMI zakryvajuć) za raspaŭsiud niepraŭdzivaj infarmacyi. Ale, jak patłumačyli ŭ Mininfarmie, piśmy prosta infarmavali ab niedapuščalnaści parušeńniaŭ zakanadaŭstva. Pryčyny taho, čamu listy byli vysłanyja mienavita hetym resursam, Mininfarm nie nazvaŭ.
Ciapier čytajuć
Jak skłaŭsia los Jany Pačyckaj — dziaŭčyny, jakuju zatrymlivali razam z Kanavałavym i Kavalovym pa spravie ab terakcie ŭ mietro9
Kamientary