Ліст Мінюста не ёсць пісьмовым папярэджаннем і тычыцца партнёраў Tut.by.
«Мінюст звярнуў увагу «Тут бай медыя» на парушэнне заканадаўства», — напісала «Советская Белоруссія» 19 мая. Такая фармулёўка была ўспрынятая некаторымі як папярэджанне парталу Tut.by.
На самой справе «Тутбаю» ў гэтым выпадку нічога не пагражае, растлумачыла «Нашай Ніве» юрыст Людміла Чэкіна.
Міністэрства юстыцыі накіравала ліст партнёрам Tut.by, ТАА «Блінгбай», што арэндуе ў «ТУТ БАЙ МЕДЫЯ» дамен трэцяга ўзроўню (realty.tut.by/bezagentov), копію ліста атрымалі і на Tut.by.
Кампанія «Блінгбай» прадстаўляла на realt.tut.by сэрвіс прыватных абвестак па здачы кватэр у арэнду, аналагічны сэрвісу на сайце bling.by.
«У лісце гаварылася, што дзейнасць па прадстаўленні інфармацыйных паслуг, што тычацца арэнды нерухомасці, можа лічыцца рыэлтарскімі паслугамі, — распавядае юрыст. — Азначэнне рыэлтарскай дзейнасці ў нас вельмі шырокае, яно ўключае збор і прадстаўленне інфармацыі пра попыце і прапанове на рынку нерухомасці. З такой трактоўкай ні мы, ні нашыя партнёры, не згодныя цалкам. Будзем праводзіць дадатковыя кансультацыі, рабіць запыт у той жа Мінюст».
На сёння «Блінгбай» прыпыніў аказанне «спрэчных» платных паслуг. Супраца з «Блінгбай» — партнёрскі праект «ТУТ БАЙ МЕДЫЯ», але «Блінгбай» — асобная арганізацыя. Закрыццё, забарона ці штраф не пагражаюць «Тутбаю».
«Ліст складзены ў такой… скажам так, дапушчальнай форме, — тлумачыць Чэкіна. — Не зусім зразумела, што ў сайце прыватных абвестак, інфармацыю на які дадаюць самі карыстальнікі і яны жа непасрэдна заключаюць пагадненне з патэнцыйным арандатарам, можа разглядацца як пасрэдніцкая дзейнасць. Рэсурсаў, прысвечаных нерухомасці, у сеціве даволі шмат, у тым ліку тых, што аказваюць платныя паслугі. І ніхто з іх, наколькі нам вядома, такіх папярэджанняў пакуль не атрымліваў».
***
Практычна адначасова з навіной пра ліст да «ТУТ БАЙ МЕДЫЯ» з’явіліся навіны пра атрыманне шэрагам інтэрнэт-сайтаў лістоў з Мінінфарма. Сярод атрымальнікаў сайт Аб’яднанай грамадзянскай партыі, музычны партал Tuzin.fm, культурны часопіс Kyky.org. Лісты прыйшлі нават у замежныя СМІ — у прыватнасці, «Радыё Рацыя», што робяць беларусы Беласточчыны.
У лістах гаварылася аб выяўленні на сайтах парушэнняў заканадаўства пра СМІ. З тэксту лістоў магло здацца, што сайтам як СМІ вынесенае пісьмовае папярэджанне (а пасля двух папярэджанняў за год СМІ закрываюць) за распаўсюд непраўдзівай інфармацыі. Але, як патлумачылі ў Мінінфарме, пісьмы проста інфармавалі аб недапушчальнасці парушэнняў заканадаўства. Прычыны таго, чаму лісты былі высланыя менавіта гэтым рэсурсам, Мінінфарм не назваў.
Анжаліку Мельнікаву бачылі ў Мінску ў «Дана Моле»53
Каментары