Novaja spadarožnica Łukašenki — finalistka konkursu pryhažości «Mis BRIKS» Alija
U atačeńni Łukašenki ŭsio čaściej źjaŭlajecca maładaja šatenka — Alija Karotkaja. Jak zaviedziena, uvahu kiraŭnika Biełarusi jana pryciahnuła na konkursach pryhažości. Dziaŭčyna paśpieła paŭdzielničać u niekalkich: ad rehijanalnych «Mis Minsk» i «Mis Viva Braslav» da respublikanskaha «Mis Biełaruś» (dvojčy) i mižnarodnaha «Mis BRIKS». Takaja ŭpartaść dapamahła z karjeraj nie tolki joj, ale i biznesu jejnaj siamji — miž inšaha, i biez taho davoli zamožnaj, piša «Biuro».
Konkurs dla svaich
U sakaviku 2026 hoda ŭ Kazani prajšoŭ pieršy ŭ historyi konkurs pryhažości «Mis BRIKS». Jaho arhanizavała Rasija, zaprasiŭšy da ŭdziełu tolki družalubnyja krainy. Takich nabrałasia ŭsiaho 17 — i siarod ich, viadoma, apynułasia Biełaruś. Našuju krainu pradstaŭlała 22‑hadovaja minčanka Alija Karotkaja. Jana zaniała treciaje miesca i atrymała pryz simpatyj hledačoŭ.
U svaim instahramie dziaŭčyna padrabiazna aśviatlała konkurs i jaho bekstejdž. Chvaliłasia, što kožnaha dnia vybirała stravy z «mieniu dla hurmanaŭ». Z zachapleńniem pisała pra sustrečy z Ksienijaj Sabčak, Eldaram Džarachavym, Volhaj Buzavaj, Zaraj i inšymi rasijskimi sielebryci. Ciešyłasia padarunkami ad arhanizataraŭ — navušnikami AirPods Max (kala $550), kaśmietyčnym boksam Dior ($200-400), fienam-stajleram BORK (kala $600), naborami kaśmietyki b.colour, SenSulu i Lic (ahulnaja cana kala $300).
Na konkurs Aliju Karotkuju nakiravała Nacyjanalnaja škoła pryhažości — arhanizacyja, jakaja finansujecca ź dziaržaŭnaha biudžetu Biełarusi. Aficyjna jana zajmajecca navučańniem budučych madelaŭ i pošukam kandydatak dla konkursaŭ pryhažości. Na praktycy ž tam padbirajuć spadarožnic na mierapryjemstvy dla Alaksandra Łukašenki i jaho atačeńnia. Alija Karotkaja — nie vyklučeńnie. Jana ŭsio čaściej źjaŭlajecca pobač z kiraŭnikom Biełarusi.
Addanaja zaŭziatarka
U pačatku krasavika zaviaršylisia spabornictvy Respublikanskaj chakiejnaj lihi. Pieramohu ŭ čempijanacie ŭ 17‑ty raz atrymała kamanda Alaksandra Łukašenki. Za finalnym matčam z VIP-trybuny sačyła Alija Karotkaja ŭ kurtcy z nadpisam «Mis BRIKS».
Alija Karotkaja na finalnym matčy Respublikanskaj chakiejnaj lihi, krasavik — 2026. Krynica: instahram-akaŭnt Alii Karotkaj
Padčas turniru dziaŭčyna nie raz prychodziła na stadyjon, kab padtrymać Łukašenku. Na znak udziačnaści jon daryŭ joj miakkija cacki.
Pobač z palitykam Alija apynałasia i raniej, pryčym z zajzdrosnaj rehularnaściu. U krasaviku 2025 hoda jana razam z Łukašenkam sadžała drevy ŭ budučym parku Narodnaha Adzinstva.
U mai chvaliłasia zaprašeńniem hladzieć parad z trybuny A. Tam ža siadzieli vierahodnaja dačka Łukašenki Kryścina Mocnaja z maci Śniažanaj.
U lipieni Alija naviedała schod u honar Dnia niezaležnaści, na jakim vystupaŭ Łukašenka.
Taksama Karotkaja — žadanaja hościa ŭ Pałacy niezaležnaści. U kastryčniku 2025 hoda ekskursiju joj tam praviała Natalla Ejsmant, pres-sakratarka Łukašenki.
Užo ŭ śniežni Alija znoŭ apynułasia ŭ ścienach Pałaca niezaležnaści — na navahodnim bali Łukašenki.
U studzieni Karotkaja źjaviłasia na pryjomie Łukašenki na stary Novy hod, dzie jon razdavaŭ dziaržaŭnyja ŭznaharody. Kampaniju dziaŭčynie skłała Ksienija Sankovič — hienieralnaja sakratarka NAK i eks-favarytka Łukašenki.
Uvahi Łukašenki i jahonych nabližanych Alija Karotkaja damahałasia doŭha i ŭparta. «Mis BRIKS» — heta tolki adzin sa šmatlikich konkursaŭ, u jakich jana brała ŭdzieł.
Sacyjalny lift
U intervju «Piłot FM» Alija Karotkaja raskazała, što ź dziacinstva mroiła pra konkursy pryhažości. Kab ažyćciavić maru, jana ŭžo ŭ 12 hod pačała navučacca ŭ Nacyjanalnaj škole pryhažości. U 2023 hodzie, tolki dasiahnuŭšy paŭnalećcia, dziaŭčyna nakiravałasia na konkurs «Mis Biełaruś». Pryzavych miescaŭ Alija nie zaniała, zatoje jaŭna pryhlanułasia Łukašenku: jon uziaŭ jaje ŭ tak zvanuju słužbu pratakoła — śvitu pryhažuń, jakija supravadžajuć jaho na aficyjnych pryjomach.
«Pracaŭładkavańnie dziaŭčat u słužbu pratakoła — heta prykład instrumientalizacyi žanočaj pryhažości dla ŭmacavańnia vobrazu ŭłady. Heta vykarystańnie, ekspłuatacyja, žanočaj pryhažości i źniešnaści dla palityčnaha imidžu Łukašenki», — zaznačyła hiendarnaja daśledčyca Maryna Mientusava ŭ razmovie z žurnalistam «Biuro».
Paśla «Mis Biełaruś» Alija atrymała niekalki rekłamnych kantraktaŭ. Naprykład, z brendam nižniaj bializny «Miłavica»i biełaruskim padraździaleńniem «Fanbiet» — bujniejšaj kampanii stavak na sport u SND. Taksama dziaŭčyna supracoŭničała ź firmaj «Saundkafe pradakšn», jakaja pravodzić kulturna-vidoviščnyja mierapryjemstvy. U jejnym partfolia — sumiesnyja prajekty z Prezidenckim spartovym kłubam pad kiraŭnictvam Dźmitryja Łukašenki: šou «Hieroi» i marafon «Sport dla ŭsich».
Nabraŭšysia madelnaha dośviedu, Alija tryumfalna viarnułasia na konkursy pryhažości. Zimoj 2025 hoda jana staładruhoj vice-mis Minsk, letam vyjhrała čatyry tytuły na «Mis Viva Braslav», a vosieńniu znoŭ uziała ŭdzieł u «Mis Biełaruś» i zaniała druhoje miesca.
Takim čynam, za plačyma 22‑hadovaj Alii Karotkaj užo piać konkursaŭ pryhažości. Pry hetym jana jašče nie paśpieła atrymać vyšejšuju adukacyju: dziaŭčyna zakančvaje Instytut psichałohii Biełdziaržpieduniviersiteta. Hety vypadak — pakazalny dla Biełarusi, prakamientavała «Biuro» hiendarnaja daśledčyca Iryna Sidorskaja:
«Dla studentak hałoŭnym sacyjalnym liftam u narmalnaj dziaržavie musić być univiersitet, a nie konkurs pryhažości. U Biełarusi ž konkurs pryhažości padajuć jak adzin z samych hałoŭnych sacyjalnych liftaŭ. Maŭlaŭ, kali vy budziecie takimi, to ŭ vas moža być vielmi zajzdrosnaja karjera, los. Heta adna z hałoŭnych placovak dla naviazvańnia rolevych madelaŭ. Tamu što niejkija samastojnyja karjernyja dasiahnieńni — stać pradprymalnicaj abo daśledčycaj — heta nie pasuje dziaržavie. Joj patrebnyja pieradusim łajalnyja žančyny».
Pryvabnaja źniešnaść sapraŭdy stała dla Alii Karotkaj sacyjalnym liftam. Pryčym dapamahła jana nie tolki karjery dziaŭčyny, ale i biznesu jaje maci.
Jabłyk ad jabłyni
Alija rasła ŭ zamožnaj siamji. Pavodle źviestak «Kibierpartyzan», u vałodańni Karotkich dźvie kvatery ŭ Minsku. Adna — na vulicy Kazinca, płoščaj 65 kvadratnych mietraŭ. Druhaja — u žyłym kompleksie «Parus». Heta sapraŭdny choram na 134 kvadraty. Ahulny acenačny košt apartamientaŭ — kala $330 tys.
Akramia taho, u sacsietkach Alija publikavała fota z elitnaha restarana Fabriq i nazyvała hetaje miesca «ŭlubionym». Im sumiesna vałodaje švahier Dźmitryja Łukašenki — Uładzimir Kułakoŭ.
Akramia hetaha, Alija adpačyvała ŭ darahim zaharadnym kompleksie Robinson Club, jaki adkryŭ nabližany da Łukašenki biznesoviec Pavieł Tapuzidzis.
Taksama Karotkija ŭ poŭnym składzie rehularna lotali na adpačynak u Abu-Dabi.
Pry hetym doŭhi čas u siamji pracavaŭ tolki baćka — Andrej. Miarkujučy pa źviestkach «Kibierpartyzan», jon zajmaŭsia pastaŭkami b/u zapčastak dla mašyn ź Jeŭropy ŭ Biełaruś.
U maci Alii, Dzijany, pieršy i apošni zapis u pracoŭnaj knižcy źjaviŭsia ŭ 2018 hodzie — «Nacyjanalnaja škoła pryhažości». Nieviadoma, čym žančyna tam zajmałasia, ale praca była pa kantrakcie. Da taho momantu jaje dačka ŭžo niekalki hadoŭ navučałasia ŭ hetaj škole. Dziakujučy jejnym pośpiecham Dzijana pačała ŭłasny biznes.
U 2025 hodzie žančyna stvaryła brend adzieńnia «Kiali». U jahonych sukienkach Alija Karotkaja brała ŭdzieł u konkursie «Mis Biełaruś». Rekłama vyjaviłasia ŭdałaj: užo praź niekalki miesiacaŭ Dzijana Karotkaja pradstaŭlała svaje pracy na modnych pakazach u Minsku. U jakaści adnoj z madelaŭ vystupiła jaje dačka. U strojach ad mamy Alija paźniej źjaŭlałasia i na mierapryjemstvach, arhanizavanych Łukašenkam. U brendzie «Kiali» jana pajechała i na «Mis BRIKS». Hetaja mižnarodnaja placoŭka mahła stać vitrynaj dla dziaržaŭnaj lokaj pramysłovaści, jakoj tak hanaracca ŭ Biełarusi, ale mahčymaść addali noŭnejm-brendu.
U sacsietkach Dzijana Karotkaja radujecca za karjernyja pośpiechi dački i va ŭsim jaje padtrymlivaje. Jana časta supravadžaje Aliju na konkursach pryhažości i razam ź joj naviedvała Pałac niezaležnaści.
Šaściareńki sistemy
Spačyvać na łaŭrach paśla tryumfu na «Mis BRIKS» Alija Karotkaja nie źbirajecca. U intervju «Piłot FM» jana raskazała, što płanuje ŭdzielničać u inšych konkursach pryhažości i choča, kab ich u Biełarusi rabiłasia tolki bolej. Pavodle słoŭ dziaŭčyny, heta asabliva važna ŭ hod biełaruskaj žančyny, jakim Łukašenka abviaściŭ 2026-ty.
Iryna Sidorskaja prakamientavała padobnuju łohiku ŭ razmovie z žurnalistam «Biuro»: «Hetyja dziaŭčaty — achviary abstavinaŭ. Jany prosta nie bačać dla siabie inšaha vyjścia, jany bačać voś hetuju patryjarchalnuju aŭtarytarnuju sistemu, i jany absalutna nie dumajuć, što jany mohuć štości ŭ joj źmianić, a dumajuć, što jany mohuć tolki padładzicca pad hetuju sistemu».
Alija Karotkaja, miarkujučy pa jaje intervju, upeŭnienaja, što zajmajecca važnaj spravaj — i tamu ž vučyć inšych. Za apošnija tydni jana pabyvała ŭ składzie žury na niekalkich studenckich konkursach pryhažości. Tudy jaje zaprašali jak prykład dla inšych dziaŭčat.
«Kali maładyja dziaŭčaty pastupajuć va ŭniviersitet, naŭrad ci jany zahadzia viedajuć pra ŭsiu hetuju strukturu, u jakuju jany patrapiać, pryjšoŭšy na konkurs pryhažości. Jany dumajuć pra rekłamnyja kantrakty, jany dumajuć pra toje, što heta zrobić ich televiadoŭcami ŭ Biełarusi. Ale jany nie dumajuć, što heta zrobić ich nałožnicami Łukašenki abo stvaralnicami jahonaha imidžu. I ŭ hetym płanie ja b absalutna dakładna ich by nie abvinavačvała. Tamu što jany ŭ hetym vypadku achviary režymu. Dziaŭčyna, jakaja pieramahła ŭ konkursie «Mis Biełaruś», moža tolki paśla hetaj pieramohi daviedacca pra asablivyja «pryvilei», jakija buduć daravanyja joj. Prosta jana ad ich admovicca nie zmoža. Užo», — zaznačyła Maryna Mientusava.
Ciapier čytajuć
Jak skłaŭsia los Jany Pačyckaj — dziaŭčyny, jakuju zatrymlivali razam z Kanavałavym i Kavalovym pa spravie ab terakcie ŭ mietro8
Kamientary